Aliwa ran malimgas tan marakep ya impangawes a bibii so linmoob ya ontan lay impakatawag day imanoy amin ya wadman, patí si pári Sibyla; aliwa met a si Kapitan General a kaolop toray mangaantabay ed sikato so akasengeg a samay teniente singa binmilay so liknaan to ya akakorang na pigara ya sinmingger, tan si pári Dámaso ag akagalaw a singa nagmaliw a bató: saray sinmabí, andi arum no ag samay akanritraton may nankawes na "frac", ya kaolop ton sonkadawat so sakey a lakín balíwan ya wala nid kalangueran.
"Maabig a lábi ed sikayon amin! Lábi, Amá!", kuay inmonaonan balikas nen Kápitan Tiago ya nanpinsiw ed saramay papári; saraya balet alingoanan dan binindisionan: samay dominiko inekal toy salming to pian nanengneng ton maong imay balolakin kasabisabí to, tan si pári Dámaso pinmesiaw so lupa to ya manmuldag iray matá to.
"Napagalangan ak a mangikabat ed Don Crisóstomo Ibarra ed sikayo, anak na kaarok ya andi lad bilay," intuloy nen Kápitan Tiago; "kasabisabí ton nanlapod Europa tan linma ak ya inabet ko."
Diad inkabitla tonyan ngaran, pigaray agda apukpokay impakapangibalikas day "ah!"; samay teniente
alingoanan ton inggalang si akanabong; sinmingger ed samay balolaki ya ninengneng ton pinatágay pinaleksab. Saya balet misasalsalita lay naugaliyan ed amin day wadman ed saman a doipo; anggapó met ingey nanengneng ed sikaton makatawag na imano onó kidumaan to bilang ed saray wadman, likod labat so kawes ton andeket. Sa balet so apalabian a kinatagey to, say lupa to, saray galagalaw to, singa ra isasamiong so
