Anggapoy nilingaw to, dinagos toy pandokdukolay agmakayari, binenbenan tod lima tan inkuantod ag nibalikas a panangaro ya bansag na insahnay day lua to: “IMaria! Maria, anako, agka ompatey!”
Linmimatay Maria tan ninengneng ton singa nikelawan. Amin day makapikabat ed kinen pari Damaso anggapoy anggan sakey a manilalo ya amta toy onsibeg; anggapoy manisia, no agda anengneng, ya anggan onman lay pansigla to tan langalangas et wala met manayay puso to.
Si pari Damaso anggapo lay nibaga ton arum, inmarawi la ya mannangis a singa ugaw, tan pian nibesngaw toy ermen to ed kabukoran, amaarap ed caida, dimad sirum da ran may kinmakalab a tanaman ed balkon nen Maria Clara.
“! Agaylay panangaro tod inanak to!” kuay walad nunot day amin a wadman.
Si pari Salvi sankanengneng ton ag onggalagalaw tan andi esel ya inketket toy daiset ed bibil to.
Nen akaimasmas na daiset si pari Damaso, inkabat nen Donya Victorina ed sikatoy Linares, tan sinmingger yan magalgalang. Andi esel a ninengneng nen pari Damaso ya pinatagey tan pinaleksab, inawat toy idederew ton sulat, insan to binasa ya agto amd atalusan akin et oniay tinepet to nen kayari to:
“?Siopa kayo balet ey?”
“Alfonso Linares, inanak ak ed biniag nen bayaw yo ” kuanto nia ed makalnan bosis to.
Si pari Damaso insikarkar to, tan ninengneng ton tineregan a maong si balolaki, linmigsay lupa to, tan inmalagey.
