“!Sika sirin so inanak nen Carlicos!” kuanton nilakap to; “gala dia ta lakapen taka akaawatak na sulat to nen sakey ya agew....! Sika sirin! Agtaka abirbir .... panon ta, agka met ni manaya inanak nen onsipotak diman; agtaka abirbir!”
Insan to lamet nilakap ed mabisbiskeg iran taklay to, ya manbalangay lupa nen balolaki ed agla amta no kababaingan to odino kakaaposan to. Si pari Damaso singa to la alingoanan ya aminpinsan so ermen to.
Nen kayari ton nilalakap tan nantetepet na nipaakar ed Carlicos tan si asawa ton Pepa, inkuan nen pari lamet;
“Mayapa natan, antoy labay nen Carlicos a gaween kod sika ey?”
“Wala amoy inbaga rad tan ed sulat ay......" nen Linares a siansian makalkalna.
“?Diad sayay sulat ay? Nengnengen ko pa? !Ay tua! Labay ton yanapan ta kay anapan mo tan bii ya asawaen mo! Hmm! Anapan .... say anapan maino nay; ?amtam so manbasa tan mansulat?”
“!Abogado ak, nanexamin ak ed Universidad Cen tral tan akasapatak!”
“!Abogado ka sirin? Agmo salo nengneng, singa ka maletletey a marikit, et lalon abig no abogado ka! Balet ta say biin asawaen mo .... hm! hmm! sakey a bii........... ”
“Anggapoy kaganatan, Ama,” kuanen Linares a mapalaloy sikig tan kababaingan to.
Si pari Damaso balet mamaspasiar dimad caida ya oniay imemeremere to: “ .'Sakey a bii, sakey a bii!” Anggapo la may lupa ton maerermen, balet ta agmet maliket no agta mabinbinta ya singa mannonunot na araldalem. Si pari Salvi banbantayan toy nagagawa anggaman arawid sikara.
“Agko inilaloan ya onia lay iter tod siak ya ermen!” kuanen pari Damaso ed makalkalna tan akisakisan a bosis to; “balet ta diad duaran manges pilien so magmaong!”
Insan sinmingger ed Linares tan inkasil toy sangi to:
“Gala dia,” kuanto, “ta misalita itad kinen San tiago.”
