Pinmesiaw so lupa nen Linares tan akilan impaigoyorgoyor na daiset ed samay pari ya manaakar a siansia nin sinonunot. Kaarawi ra, binmales si pari Salvi ya mamaspasiar dimad salas, a nengneng to ngolay mannonunot na araldalem ya unong na naugaliyan ton gendat.
Akatonda ed pamaspasiar to nen nangel toy angigalang ed sikato ya angiter na maabig a kabuasan. Tinmangua tan anengneng toy Lucas a mangilulugay a maabeba.
“?Antoy labay mo?” kuay tepet na mata nen kura, ta ag man sinmalita.
“Ama, siak so agi ton may inatey nen agew na pista."
Akasoner si pari Salvi.
“Eh, akin ey?” kuanton tinepet ed bosis ton agla wari binmesngaw.
Si Lucas papasouten toy onakis a punas a punas na panyo ed saray mata to.
"Ama,” kuanto lamet ya akisakisan, "nanlapoak ed abong di D. Crisostomo ya onkekerew na tulong ed impatey nen agik .... Nen onan inakar ko, dinedepakan daak ya inkuandan agda labay so manbayar ta dinmalan met ed kaatapan so bilay da nisesengeg ed kasalanan nen agik. Pinmawil ak lamet karoman ta labay ko lamet wari misalita ed sikara, et agko ra asabian ta pinmikal ira konon linmad Ibale. Intilakan daak na li man lasus pisos a panangasi ra kono, tan inbilin dan agko la ompawil a balobalot. Ay, Ama, palurey kayo tay singa liman lasus labat bilang so bili bilay nen agik, — liman lasus pisos labat, Ama! . . .
Balibali idedengel nen kura nen gapd, ya tatalinengen ton maong a mankelaw, et nen manbayag la tan atalusan toy pankokonkuanan nen Lucas, nankalkalnan pinmatnag ed saray mata to tan lupa toy ontan lan panmurmura tan sanok a no naimano labat nen Lucas, inian to angankoy kuyat.
“Eh — antoy labay mo natan ey?” kuanton imbeneg to.
“ !Ay Ama! Panangasi yo pala ya ibangat yoak no antoy maong a gaween ko! Amtak ya anggapoy arum
