balingit na maliga tan ag arumsisan a kalanguerán a bansag dan binolaslasay kamarerua tan laman. Nanengneng ed lupa to ya maliwawa tan magayaga, so daiset a dalay kastila ya mapatnag nin napaaninagan ed baog ton malinew a kayomanggí, ya balangabalangaan ed aping nisesengeg lági ed impanayam tod bansa ran ambetel,
"Ah!" kuantod maliket ya inkikelawan; "say kura ed baley ko! Pári Dámaso ya malet a kaaro di amak!"
Amin a matá linminggis ed samay pransiskano; saya ag ginmalaw.
"Itepel yo ak, akabálo ak!" kuanen Ibarra ya singa agagá tan nababaingan.
"Andi, agka akabálo!" kuanton may sakey nen akaebat ed bosis ton ginmanalgal. "Balet ta agkon balot malet a kaaroy amam!"
Si Ibarra inleksab ton nankalkalnay lima ton yaawat to lawari, ya sankanengneng to may pári ya napnoy kelaw, pinmigar tan apuntay matá to may teniente ya agni tinmondan mannenengneng ed sikato.
"Kaaro, anák kayo di Don Rafael Ibarra?" --Intewek nen balolakí.
Si pári Dámaso nampetek ed yurongan to tan ninengneng ton sineleng si teniente.
"Iter kod sikayoy maabig ya insabi yo ed báley yon nianakan tan oy la komon no mas maliket tan mapalar kayo dia nen di amá yo!" kuanton may teniente ed bosis ton giwgiwan. "Kabkabat ko ra tan apitoowan ko ra tan nayarian kon ibagá ya sakey ed saray lalakín sankagnapan ed kaabigan tan sankaptekay panagnunot tan ugáli ed Pilipinas."
"Sinyor!" inmebat si Ibarra ya akasíbeg; "saray dayew yod kindi amak punasen daray duaruwak ed adatngán dan kapalaran a siak a dilín anak da et agko ni kabat."
Sinmalmay so luá ed matá ton may teniente, pinmigar tan inmarawi lan masigsiglat.
Atilak a bukor si balolakí ed pegley na salas: si akanabong andi lad man, tan anggapoy naalmo ton
