Si kaanakan tod saya aminpigan intagey toy panyolito ya impunas ed saray mata to tan napatnagan ed kalilinawa to ya mannangis.
"!"Agay lay abig to a!” kuanen akulaw ed nunot ton dili, “anta ontan la lanti katotulok tod amin a too! Mas dakel na amayamay so impankasalanan ko, et agko ni asali akaakis a petepeteg.”
Tan inggapo toy komaliman ganggan a manbayag so katotonda to tan lalon mananges so bosis to, tan on tan lay kaliliketan tod panbabasa to ya agto naimanoy popokpokan nen Maria Clara ya panangis tan pansibek to. Bukor labat nen akatondan aminsan kayari ton binasa ray paliwawan nipaakar ed pangikanay ayura ed pamatey na kaparan too, so impakaimano toy pansibek nen makasalanan a babasaan to. Diad saya singa nanaayapan a manbabasa, impalongog toy bosis to ya singa mamapagiaw tan nen anengneng ton mannangis ni kaanakan to:
“Nangis ka, anako, nangis ka!” kuanton sinmingger ed dukolan, “ta diad ipalaloy pannangis mod saray kasalanan mo, lalon maganoy pamirdonay Dios ed sika. Mas makana lawas so ermen ya iter na contrition nen say atricion.(1) Nangis ka labat anako, nangis ka! Agmo labat amta no panoy liket kon makanenengneng ed sikan onnanangis! Mandugal ka met na pagew mo et makalna labat ta agmakayari ka ni.”
Balet ta nakaukolan pa lagid ibesngaw tan iloor na ermen so kabukoran, ta akin et diad impangibano nen Tia Isabel et nankalkalnan tinmaang so pannangis tan pangeswa nen Maria Clara, tan pinonasan to ray mata ton andi esel ya agto met inebatay panginaen to.
Saya intuloy toy panbabasa to et maniapod tin monda lay pannangis nen onderengel ed sikato, nakal lay kakaayapan ton manbasa ya sinmabi lay temeg to tan manuwab la ed bandad unor iran ganggan a manpoltot lamay bosis ton apasakey ya angesan.
“No agko labat anengneng na matak iran dili, agko
manisia!” kuantod nunot to, “sayan ugaw mankakasalanan a singa sondalo ed saray inmonan limaran gang-
________
(1) Say tales na contricion say pansibkel ed kasalanan nisesengeg ed dilin arod Dios; tan say atricion say pansibkel nisesengeg ed takut ed kapelag ed inpiemos.
