Diad makuykuyep a liwaway bulan ya ontatalus ed masalsalindak iran sanga ray kakiyewan, manaakar a matantan tan mareen so sakey a laki ed makdel a katakelan. Tonggal paminsan, ta pian lagi walay makapangitonton ed sikato, manngisiw na nidumaduman tono ya eebatan na sananey a too ya ingingisiw to met iman a togtog. Ontondad satan imay manaakar, talinengen ton maong, insan to lamet ituloy so kurang to ya mamaarap ed samay bandan pakakangelan to may oneebat a ngisiw.
Anggaman onman lay irap na panakar no labi ed makdel a katakelan, akasabin siansia may too ed melag a pasen a mapatar a sisindagay bulan a kakapat lay yaarap tod pansulaw to. Sayan mapatar a pasen aliktob na atatagey iran batd ya tinotuboan iray kiew ed pantok, ya aliling day agesanggesang ya anfiteatro;(1) di mad pegley wadman iran abonton so kiew iran kapanpopo tan sengeg iran inmoring a kalaok da ray ankakabaleg iran baton tinotuboay dikadika tan ankelag iran kiew.
Kasaliwangwang ton tuloy ed saman a pasen nimay lakin manaakar, nitan met lan pinmaway a biglan nanlapod sanib na sakey ed saramay ankakabaleg a bato so sakey met a too ya sankabenbenan ton impatuyong so paltog ed samay sinmabi.
“?Siopa ka?” kuanton tinepet ed salitay tagalog ed
tanol na bosis a mapasang tan bansag na impangikasa
ton may benbenbenan ton paltog.
________
(1) Anfiteatro — Paalagey a binato ya malimpek ono inmiknol tan pinaliberay nantaktakayan iran yurongan. Panangipawayay nambabangil iran ipapaway. Singa bilang say Araneta Coliseum ed Quezon City (Phil.).
