“?Wadian iba yoy masiken Pablo?” kuanen sakey ed bosis a mareen, ya agto inebatan so tepet dad sikato tan agmet tinmalaw.”
“Si Kapitan so labay mon ibaga? On, wadia.”
“Ibagam sirin ta anapen nen Elias,” kuanen sinmabi ya andi arum no ag si kabat tilan piloto.
“Elias kayo?” kuanton tinepet nimay sakey ya apatnagan ed bosis toy panamagalang, insan inmasingger, anggaman agto met inleksab so paltog to; “no ontan sirin itila.”
Tinmonbok si Elias. Tinmobong irad sakey ya ungib a tinmalus ed daledalem na dalin. Si mangitotunton ta patlep toy dalan, ipapasakbay tod kinen piloto no nakaukolan ya onlosor, ontewek ono onkurong, odino onilos; asabiray pasen a mamaawang ya aiding bilang na salas a sinileway sinigit ira ya ininay brea, tan wad man iran nanengneng so sakey a labmdua ono labin liman totoon akaarmas, a marindingot so lupa ra, makapataktakot so nengneng na kawes da, ya manyoryurong iray arum, mandokdokol iray arum tan anggapo la wari oneesel. Akapapeg iray siko to ed tapew na sakey a baleg a baton palanas ya onkakanan lamisaan, tan imimanoen ton sinonunot imay silew a makuykuyep anta onman lay palet na asewek to, nanengneng so sakey a masiken a maerermen a inkalupa tan binerber so ulo toy lupot a kadadala: no agtayo komon amta ya sakey iman ya ungib day tulisan, nibaga tila ed pakanengneng tayoy inkaandi ilalo ed lupa ton may masiken a nakar tayoy Tori na Eras diad dispiras na impansira nen Ugolino ed saray anak to.
Kasabi nen Elias tan samay angitonton ed sikato, inmalibarbar iran midio inmalagey iramay wadman a totoo, balet ta diad sakey a sinyas ton may angitonton, dinmeen ira tan sankanengneng da labat si piloto ya anggapon balot so armas to.
Nankalkalnan inlingaw nen masiken so ulo to tan anengneng toy Elias ya saya inekal toy sombriro to tan agto alisay mata, ya akapinta ed lupa toy kaermenan tan pililikna.
“?Sika manaya?” kuanen masiken a singa linmigsay nengneng to nen abirbir toy Elias.
