“Agko inilaloan ya oniay itsura yon sabien ko!” kuanen Elias a makalna tan manpeyeng.
Intewek nen masiken so uld to ya andi esel, sininyasan to ra may totoo, tan saraya inmalagey iran pinmaliis balet ta inimano da nin maong so katagey nen piloto tan maregkel ya impanlaman to.
“!0n!” kuanen masiken ya inebatay Elias nen bukbukor da lan dua; “Anem bulan lay linmabas nen sinayakop taka ed abong ko, ya siak so masiadoy panangasik ed sika; natan, nansalat so kapalaran, tan sikay mangaskasi ed siak. Et yurong ka pa, tan tongtong mo no panoy impakasabim ya anga dia.”
“Labinlimay agew la anganko natan a nangelan koy sinmabid sikayon kairapan,” kuanen piloton inmebat ed bosis a matantan tan makalna, ya sankanengneng to may silew; “kinmurang ak a tampol tan binaliksat ko ray kapalandeyan ed panaanap kod sikayo: aliber ko la wari duaran luyag.”
“Lapo lambengat ed agko labay so makapaterter na dalay totoon andi kasalanan, apilitak a binmatik; saray kakabusol ko antakut iran omparungtal, tan saray yaarap dad siak totoo ra kalamor a masegsegang ya anggapon balot so ginawa rad siak a bengatlan kaugsan.”
Tinmonday daiset si masiken tan sankanengneng nen Elias a singa to tetebeken iray ambilbilunget iran kanunotan ya onpipintad lupa to, insan to inkuan:
“Linmaak dia ya mangiparungtal ed sikayoy sakey a kanunotan. Ginawak lay anggaay nayarian ko ed impananap koy siopaman a mogmon nakdaan a manbibilay ni ed boleg ya amairap tan amasegsegang ed dili met a boleg ko, et anggapoy arumog kon balot, kanian apaabig ko lan taynan so panbibilayan kon luyag natan ya ontawtawak lan mamaarap ed Arnie nen a manayan ed pulok day totoon bugkalot ya manbibilay irad kawayangan: agkayo ta no taynan yo lan ilingoan so panagbilay ya igagapo yo tan mila kayo lad siak? Ipasen yoak lan anak ta naandi met la ra ed bilay so anak yo, tan ontan ko met, siak ya manbibilay ak ed kabukbukoran, ipasen ta kayo lan pinagkaateng.”
Pinmeyeng si masiken tan oniay inebat to:
“No sakey a toon asabi to lay kinatatken ko et napaabig ton gaweey sakey a pamaakaran ya agto ikabi-
