mangikabat ed sikato ed saramay mamárikit a dakel ed sikaray sankanengneng da. Nanduaruwan aganó insan sinmingger a napnoy grasia ed sikara.
"Abuloyan yo ak pa," kuanto, "ya luksoan ko lay sakey a totuntonen ed maabig ya inkabangát. Pitoy taon ya andiak diad báley ko, tan diad ipawil ko agko napukpokay inkasiak ed pangilúgay kod sankablian a parakep to, ya saray bibii."
Manlapod anggapoy tinmalek ya inmesel, apasout ya inmarawi. Amaárap ed doipo na pigaran lalaki ya initdan day lugar nen anengneng dan nitanla.
"Sinyores!" kuanto, "walay sakey ya ugáli ed Alemania ya no say sakey ya anggapoy kabat to et ondagód sakey a doipo insan anggapoy mangikabat ed sikato, sikato lan díli so mangikabat ed laman to tan mangibagay ngarán to, tan ontan met so gaween day wadman. Abuloyan yo ak pan mangikaná nian ugáli, ya aliwan say pangigapok iray ugáli ra ed arum a bansá ta saray dílin ugáli tayo et marakep irá, no agta lapod napasout ak labat. Inlúgay ko lay tawen tan saray bibii ed baley kon nianakan; natan labay ko met ya ilúgay iray mibabáley, saray kabaleyan ko. Sinyoris, say ngarán ko Juan Crisóstomo Ibarra Magsalin!"
Sakey tan sakey ed saramay wadman inmalig ya angibagay ngarán to, ya wala lad tay kabkabat, wala met lad tay agni nangnangelan.
"Say ngarán ko A. . . . . a!" kuay sakey ya wala met nid kalangueran ya amagamagá tan samsamet tinmuwek.
"Napagalangan ak pa lági ya misasalíta ed omaanlong. (1) ya saray sulsulat to et akaiba ran nantambayoy dalang na arok ed báley kon nianakan? Nangelan ko ya ag kila mansusulat, balet ta anggapoy akapangibagad siak no antoy makasengeg.."
"No antoy makasengeg? Say makasengeg ta seláng a tuloy a liingen so layap na kanunotan insan paabebaen a mantíla. Walay sakey a nidalem lapo lambengat ed impangisulat tod anlong na sakey a katuaan nen Pedro Grullo. (2) Tatawagen da ak na omaanlong,
(1) Managsulat na birso.
(2) Say labay ton ibagá so sakey a katuaan a sankapatnagan a kalokoan labat so pangibagá. Singa bilang say pangibagá na "say liman akakupit, poniti."
