“Nanengneng, no walay posta.”
“Pigay iposta yo a?”
“No kulang a duara (duan libo) agko ibulang.”
“?Anengneng yo lay bulik ko?” kuanen Kpn. Ba silio ya tinawag toy sakey a lakin sankabenbenan toy manok a melag.
Inala nen Kpn. Tiago ya sininyalan tan impawil to nen kayari ton binitbit tan inimano ray siksik day sail to.
“Pigay iposta yo ey?” kuanto.
“Paraan ta kayo.”
“Duan libo tan liman lasus?”
“?Talora?”
“!Dali, talora!”
“Sayay ontumbok!”
Diad pulok day miron tan saray susugarol binmawag a tampol so balita ya manarap so duaran inatalonggaring ya ibubulang. Bantog so inkaiwi ran dua tan ontan met na kaabigan da. Amin day wadman labay da ran nengnengen a sinyalan, a sakey tan sakey so mangibagay kaisipan to tan dakel met lay mangipaonay kasumpalan.
Diad saya mankasil so ingal, manbaleg so gulo, lombaan so onloob dimad Rueda ya dakel laray nilolokso ran nilalampat iramay yurongan. Saramay mangibulos sansakey iray awit a manok, kanaway tan ambalanga ya akatari lara balet ta akakaloban ni ray tari. Sankarengel so ingal day totoo ya mangibabagay ‘!ditan ak ed kanaway!’ ‘!ditan ak ed kanaway!’ tan no arum onsalet met a tonggal paminsan so ‘!ditan ak ed ambalanga!’ Samay kanaway so Ilamado ta dakel so posta to, say dejado samay ambalanga.
Walaray guardia civil a liberliber ed utel day katoowan. Ag ira nanuniporme, balet ta duma met so kawes da ed karaklan. Nanpantalon iray guinggon a pinagiligay ambalanga ed saloy, aysing ya inanagan a pinmaspas ya abarakbarak, tan nanggorra ra na ikakana rad kuartel; sikatoyay kawes dan kalakalat na kagagawa ra, manbabantay ira tan ompoposta met ira, ya aasikasoen day kareenan a kuan, anta mas makagugulo ni ra no arum.
