- Jele jele bago quiere.(1)
Si pari Sibyla. singa nagnagnap so liknaan to: manaakar ya matantan tan mareen, tan diad maimpis tan akakupit iran bibil to anggapo lan nanengneng so panlemlemew. Misasalita ni ingen ed piley a doktor De Espadana ya saya ebatebat kalamor na sansansakey ta ataata lantin talaga. Samay pransiskano masiadoy uges na ulo to, indedepak toray yurongan ya walad dalan to tan sinikil to nimay sakey a manaaral a mansondalo. Samay teniente ag oneleelek; sara balet so arum mantotungtong iran masaysayaksak tan mandinayew irad onmanlan karakel na kanen ed lamisaan. Si Donya Victorina balet sinilot toy eleng ton napnoy balaw, insan biglan pinmigar a mamapasnok a singa uleg ya agatinan, ta samay teniente agatinan ton tua manayay dikolay kawes to.
“Antotan, anggapoy mata yo?” kuanto.
“Waia pa, ali, ya duaran mas maong nen saray ma ta yo, balet ta nenengnengen ko lanti ratay kulet yo ay,” kuanton inmebat nimay teniente ya makulang na panagdayew ed saray bibii, insan la inmarawi.
Diad inkipasal dala lagi, saramay duaran papari nambansag iran inmarap ed uloay lamisaan, kanian ag pankelawan ya agaway singa nagagawa ed saray malabay a manbangat ed sakey ya universidad ya onlabas irad iksamin, a sakey tan sakey et konnuarin idayew daray katagam da ya anta diad kaunoran et ipatalos da lan lamang a say ibabaga ra et sumlang, in san nguronguro ra no agda naalay dadapaten da.
(1) Mankunkuanan.
