Anggapoy akasel ed sikaran wadman. Diad nagogonoyan nen akakurang a sinmingger si Ibarra, inkuanton makalkalna ya manggiwgiw:
“Kasabisabik a tuloy tan batik ak dian tampol a minengneng ed sika. Salamat ta mas maong lay itsuram ya asabik nen sawari inisip ko.”
Si Maria Clara singa naemel ya anggapoy nibaga ton anggan sakey a salita, tan agto met tinmangua.
Pinatagey tan pinaleksab nen Ibarran ninengneng si Linares, kanenengneng a sinostine tonian ag ginmalagalaw ya anta onman lan inkabaing to.
“Agmoak manaya tatalaranan ya onsabi,” kuanen Ibarran matantantan; “itepel moak, Maria, ta agak la impaipakabat; diad arum ya agew ipaliwawak ed sika so amin ya agawa .... makapannengneng ita met ni..... ya andi saew.”
Sarayay kaonoran a salita tekep day inlimgis tod kinen Linares. Intangua nen Maria Clara ed Ibarra ray mata ton marakerakep a napnoy ermen tan kasimpitan, a napno ray pikakasin singa ra mansasalita, ya si Ibarra akatondan agto amtay pamaakaran to.
“Nayarian koy onia dia nabuas?”
“Amtan la ya maliketak lawas ed yakar mo dia,” kuanen Marian inmebat a makalkalna.
Imanlay Ibarra ya andi pagpaga ed pakanengneng, balet ta kanunotan toy singa manieluag tan puso to balet so naktel. Agto natebek ono natalusan a petepeteg so anengneng tan alikna to: anto man kasi, — duarua, aron naandi, odino kapaklapan?
“!Ah! biin siansia!” kuanton makalkalna.
Akasabin agto naamamtaan ed samay pasen a pangipapaalageyan na eskuilaan; wadmay Nor Juan ya awitawit to ngola may mitro tan patawin, tan liliberliberen to ran nenengnengen iramay mankikimey. Kanengneng tod Ibarra binatik ton inabet.
“Don Crisostomo,” kuanto, “akasabi kayon siansia; abayag mi kilan tatalaranan; nengneng yo pa rayay padir ay, masulok lan sakey mitroy katagey da; palabas yoy duay agew singa la ra katagey na too. Agak mamapaikanay arum a kiew no ag bukor labat na bolawen, dungon, ipil, langil; mamapaala ak met na tin-
