kokurang na togiop day papari natan, nakaukolan ira balet ed sarayan panaon a singa kabaliksan da may tatawagey kaugsan a nakaukolan!”
Tinmangway Elias a mapalaloy inkikelawan to tan sankanengneng toy Ibarra ya singa agaga.
“?Manisia kayo met sirin, sinyor, ed ‘kaugsan a nakaukolan’?” kuanton giwgiway bosis to, "say pakaisip yo sirin ta pian nagaway kaabigan nakaukolan so manggaway kaugsan?”
“!Andi; no ag say ipapasen kon singa bilang sakey a mabiskeg a tambal a kapilitan ya ikana no labay tayon onabig so sakey a sakit. Nengneng yo, say bansa aliling toy sakey a toon abayag lan mansasakit, tan diad pamaabig ed sikato, say Uley napapasuot a mangikana ray tambal ya anggaman ibaga yo ni bilang ya ampait odino mapalaloy sakit, balet ta makapaabig.”
“Makapoy a doktor, sinyor, no tepeten ono nengnengen to labat no antoy onsasakit insan to timpeyen a patondaen, ya agto suysoyen ya anapen so pansesengegan to, insan to tambalen, odino amta to et antakut to balet a pakanaay mabiskeg a tambal. Sikato tan met labat so anganggaay gagaweey Guardia Civil: say pangikakana toy biskeg tan pamatakot a pamaer to ray gawan mauges, a nagawaan to ya nimet labat no napalaranan to. Nepeg yon nunoten ta say togiop day to too ed tapew na dalin ya tatawagey sociedad nayarian to ran eletan so sinansakey a totoo no komon ta natutulongan tora tan nibangat to ran mangibiig ed maong tan mauges. Diad bansa tayo, maniapod anggapo yan togiop ta ag ira manabet so Uley tan say baley, say Uley nakaukolan ton agamilen so panangasi, ya aliwa labat lan lapod nakaukolan ya, no agta lapod nisesengeg ed impamaulian tod saray totoo, et saraya daiset so eebatan da ta ag lanti asileway kanunotan da. Sa key ni, no tomboken tayo tay pangipapara yo ay, a saray naliliknan kaugsan a nagagawa ed bansa et aliling day masulit a sakit, say ipapakanay Uley a tam bal mapalaloy biskeg to ya lalanoren ton pakakapoyen iray arum a pasen na laman ya anggapoy deral da, ya diad saya magmainomay lara laingen a nakayamkamay sakit. Ag kasi. lalon abig no say apigeren a pabiskegen et samay pasen a walay deral tan bawasay daiset so karakel odino ontan lan biskeg na ikakanan tambal?”
