“No pakapuyen yon bawasay pakauley na. Guardia Civil iyari yod kaatapay kaligenan day kabalbaleyan.”
“Kaligenan day kabalbaleyan!” kuanen Elias ed bosis a napnoy pait. “Manlalabinlimay taon la natan so inkipasen day Guardia Civil ed kabalbaleyan, tan antoy agawaan da ey? Ag met ira nababawasay tulisan, mabetbet nin narerengelan so iloloob dan pantatakew ed binaleybaley, dakel met ni mansasabat ed daladalan; Ag ontotonday takew, tan agmet napapapaway no siopa ray manggagawa; say mauges a gawa ag napapaandi, tan say petepeteg a makasalanan liberliber ya andi pagpaga, sara balet so mibabaley a maliket komon a manbilay ed kareenan, agsi takut ira. Mantepet kayo ed siopaman a maptek a panbibilay a mibabaley no ipapasen toy Guardia Civil a sakey a makapaabig, sakey a panangiagel na Uley ed saray katoowan, ya aliwan sa key ya ambelat a sasakbaten, sakey ya uley a masulit a lalon makapairap ni nen say kaugsan tan sebeg day mauges a totoo. Tua ta baleg met so gagaween da ra nian kaugsan, balet ta matalag, tan sakey ni walay pa kauley na sinansakey a manparaan ono milaban; et no diad saray panamairap na walad pakauley anggapoy makaesel tan anggaman tuan aliwa met iran masiadon ambelat, anggapoy tonda ra balet, tan walay abobon ed sikaray Uley. Anto natay gagaween to nia ed bilay day binaleybaley ey? Paeren toy panagbaroy, pankakabatay nagagawa ed nandurumaan a pasen, pansusulatan, pangibesngaw na bengatlan kaisipan, ta sakey tan sa key agsitakut a napairap nisesengeg ed andi kakabaliksan a bengatla. Mas so pangaasikasoy andi kakanaan nen say petepeteg a panmotektek na nagagawa tan pananap na nakaukolan a polaing a sakey yan pakapatnagan ya anggapo sirin so nagawaan da. Say pakalmgoan ono pakatilak labat na cedula masulosulok lan pamalor ed sakey a too tan kapairap to ya anggano maong a toon gagalangey karaklan; saray pangulo ipapasen dan ononaonan nabebetangan dan gaween so paigalang ya inalad maong a linawa may pasootan, ya anggano diad kabilungetay labi ya ag nanengneng so nasasabat, tan diad saya, onaalig met iray saginonor da ya kaskasian ira kalamor a napapairap tan nakakatkatan so taga uma ed bengabengat lad tan a nanunotan dan pamase-
