na managsulat agko man amta. Ontan man, inarok so
baley tayo ya unong met na panangaro yo, ya aliwa labat
lan maniapod amin a too et nepeg ton aroen so baley ton
nianakan ya akautangan toy laman to tan bilay ton
dili tan ontan met lagi kaonoran a panpainawaan to, tan
aliwa met labat lan lapod ontay imbangat di amak ed
siak, no agta maniapod say dilin inak et india tan makasengeg met ed amin iray sankarakpan a pannodnunotan
ko et wadia rad sikato, tan sakey ni, aaroen ko met ta
utang kon linawad sikatoy liket ko!”
“Tan siak inarok met ta sikatoy nanlapoay segsegang ko,” kuanen Elias a makalkalna.
“On, kaaro, amtak so paniirap yo, kabat koy panbibilay yon masegsegang tan sikatoyay sakey met lan makasengeg ya ambilunget so pakanengneng yod arapen, tan sikato met la angankoy panlalapoay panagnunot yo; kaniantin onia ya no dedengelen ko ray daledalem yo singa ak manisimbang. No komon ta amtak so petepeteg a makasengeg ed ontan a panagnunot yo. . . . no kabat ko komoy anggan daiset labat ed impanbilay yon inmona. ...”
“Sananey so nanlapuan day segsegang ko, tan no amtak komon a walay kikanaan da, tongtongen ko rad sikayo ta agko man ira yaamot, insan kabat met iray dakdakel a totoo.”
"Nayarin say pakapikabat ko et umanen toy panag nunot ko; amta yon petepeteg ya agko panpipiyaan so kanunotan labat, mas lablabayen koy nitonton na matuwan agawa.”
Nannunot si Elias ya agano.
“No ontan sirin, sinyor,” kuanton inmebat, “tongtongen kod sikayoy bilay ko ed antikey a salita.”
