“Sakey ya anemaploy taon la anganko natay lininabas, si lakik manaayam ed Ibale tan sikatoy mangeegna na libroy kuinta na sakey a komirsiantin kastila. Ugaw ni lakik ed saman, walala balet so asawa to tan sakey ya anak ton laki. Sakey a labi apoulan imay tindaan ya ag amtay nanlapoay apuy, alanor toy entiron abong tan arum ni ran akamayamay a kaabongan. Lapod dakdakel so aperdi, mapilit lan inanap day nankasalanan ya akasengeg na poul, tan si komirsiante pinalsaan toy lakik ya indalem. Anggaman ipapasout tonia ya anggapoy kasalanan to anggapoy anisia, tan maniapod mairap so panbibilay to ya anggapoy nibayar tod saray nababalftan maong ya abogado, adusa ya bakbaken ya iliberliber ea saray lansangan ed Ibale. Agano ni inkapaso to nian makapabaing tan sankabandayan a panagdusa ya tatawagey baley na caballo y vaca ya mas mauges nin aminlibo nen say dilin patey. Anggapoy angabagey ed kinen lakik, inkainday amin a too, likor labat kalamor si asawa to; intaker dad kabayo, inlibot dad kalansanganan a manomtumbok iran kikalayokoy so mapalet a totoon anggapoy pililikna, tan intonda rad kapag bikuer na lansangan a diman da lasotay pinaspasia, ed arap day kapara ton totoo ya agagi ton kuan tan diad kaliberliber na akamayamay a simbaan a tatawagey abong na Dios na Aro tan Kareenan. Nen saman a masegsegang a too ya naandiay galang et apaliket to lan apera ray totoo ed inibong ton dala, masakit a irirap to tan eyaeyag to, akaukolan ya inokbaran da, ta nakalay liknaan! Oy la komon no inatey la! Balet, ta diad ag amtan makasengeg, sakey a
