tan naplag ed silong na pakauley na Justicia tan saya,
insingil tod sikaton amin so agawa to ran kasalanan,
ya anta anggapo met so ginawa to nen inmona ya impangibangat ed sikatoy maong; tan sakey a kabuasan
nen linma may anak a yogtan a basbasen toy ina to ta
inmarap ed takel a manaanap na oong et agni akapawil,
asagmak ton atomba ed gilig na basbas na dalan, ed
sirom na sakey a sengeg na kapes ya akamoldagat iray
mata ton teregtereg ya akaarap ed tagey, tan akukot
iray garnet na lima ton akagemgem ed kadadalan dalin.
Linmad ulo nen manbalbalolaki so tinmangay a tinombok toy arap day mata ton may bangkay, tan anengneng
ton akasabit ed sanga so sakey a babako tan dimad dalem na babako say kadadalan ulo nen kuya to!”
“! Dios ko !” kuanen Ibarran ag apokpokan.
“Ontan met so nibaga nen amak,” kuanen Elias ya intuloy ya amagamaga. “Saray totoo pinisagpisag da may tulisan, inkotkot day kabalgan to, sara balet so limalima tan salisali to ra inbibitin da ran insasabit ed kakfyewan ed pigapigan baley. No makakar kayoy sakey ya agew ed Sto. Tomas a maniapod Calamba, nanengneng yo nin anggad natan so sakey a sengeg na lomboy a nanbolokan na manbitbitin a sakey a sail nen pangamaen ko, ya sayan lomboy, singa inayew tan insamba ta agla binmolaslas tan agla nanbonga. Unong na asalitak la, insasabit da ray salisali tan limalima ed pigapigan baley, balet ta say ulo, lapod sikatoy sankaabigan a pasen tan sankainomayan a nabirbir, insabit da ed asingger ed alolong na ina!”
Intewek nen Ibarra.
“Tinmaynan si balolaki a singa inayew ed saman a pasen,” kuanen Elias ya intuloy “nanbatikbatik ed baleybaley, a sinasakosak tan binabaliksat toy kapalandeyan, tan, nen akaarawi la, ya isisipen toy anggapo lay makabirbir ono makapikabat ed sikato, linmoob a nankimey ed abong na sakey a mayaman ed luyag na Tayabas. Diad kuli to tan abig na ugali to, nala toy maong a linawa ray totoon akilimogan to. Diad kuli to met tan impansimpit to, akatipon, tan maniapod malanguer met ni lanti, tan linmabas met ya abenegan to la may segsegang na inmonan impanbilay to, tinmobod puso toy ilalo ya sinmabid nunot to so manbilay met a maliket. Say
