Asanibay lurem so bulan; sakey a dagem ya ambetebetel a singa la mangipapaliknay manasingger a bulay disiembre sisiplogen to ran ipapalirpalir so pigaran bulong ya amagaan, tan papaalimpokapoken toy dabok ed samay mainget a dalan a mamaarap ed kamposanto.
Dimad sirom na pinto wadman iran maneesaesan so taloran anino.
“Akisalitaan moy Elias?” kuay tepet na sakey a bosis.
“Andi, ta amtam la sansananey, insan sakey ni mapasakbay, balet ta iba tayo anganko ta inlaban nen D. Crisdstomoy bilay to.”
“Sikatotan met so akasengeg na angakoan ko,” kuanton may inmonan sinmalita; “ta patatambal nen D. Crisdstomoy asawak ed abong na sakey a doktor ed Ibale! Binetang koy konbinto ta piano makabales ak ed kinen kura.”
“Sikami balet, pinili mi kuartel ta piano nipanengneng mid saray Guardia Civil a si ama mi et walaray anak ton lalaki.”
“Pigara kayo ey?”
“Limara; masulosoluk la tan. Say kuanton may ugaw nen D. Crisdstomo so duamplo kamin amin.”
"No aliway kasumpalan yo ey?”
“!St!” kuay sakey, tan anggapoy inmesel. Diad sansamet a sinag na bulan sankanengneng dan nitanlay sakey ya anino ya ipitipit ed koral; ontunda no arum a singa lingawlingaw ed beneg to.
Tan susto met so panggawa toy onia; ta diad beneg to ed kaarawi angankoy sakey a duamplon kurang, nitan met lan manomtumbok so sananey lamet ya anino ya
