“Say itogtog na las otso ta pian makapisugal ak ed saray inaatey, ta labay koy manalo ed sayan labi,” kuanton may sakey a singa anggapo labat so walawala. “Sikayo ey, antoy inakaran yo dia balet ey?”
“Satan met.”
“Pakaliketan ko ta piano walay ibak. Awit koy nipis; diad ononan tanol na kampana, mangialbur ak, diad komadua, manbiraak; saray nipis ya onggalaw sikaramay nipis day inaatey tan sikato ra may pansasamsaman. Wala met so awit yon nipis?”
“! Anggapo!”
“?Panon sirin ey?”
“Mainomay itan; unong na say kanunotan yo et ibangkaan yo ra, no siak sikara balet so ilaloan kon mangibangka.”
“Panon ta agda kayo ibangkaay inaatey ey?”
“Antoy gaween ey? Anggapo met ni lanti ganggan a nayari ran pasouten a misugal so inaatey....."
Ag ira inmesel ya agano.
“Walay armas yo? ?Panoy pitulot yod saray ina atey ey?”
“Say ponitik,” kuanton may babaleg ed sikaran dua.
“!Diablo, nanunotan ko natan, sara manayay ina atey ag ira onposta no aliwan saksakey so mabilay, et duara itayo!”
“?Tua? Agko balet labay so onalis!”
“Siak met, ta onkukulang ak na kuarta,” kuanton may melag; “walay maong a gaween tayo sirin, sugalen tayo ta say natalo onlala.”
“Dali. . ."kuanton may sakey a singa mauges so ulo to.
“Onloob itayo sirin .... walay gurabis yo?”
Linmoob ira tan diad saman a bilunget nananap iray maong a pasen; akalmo ray sakey a panteon ya apaknaan da, tan diman da inyurong. Samay melag inala toy nipis ed takoko to tan samay sakey, angurabis tan diad liwawa to nanteregan iran maong, balet ta nanengneng ed lupa ran dua ya ag ira nankabat. Sikatayo balet nabirbir tayoy Elias ed samay baleg a malakilaki so bosis to, tan diad samay melag a piglatan ed lupa, si Lucas.
“Alsa yo!” kuanto nia ya agto alisay mata.
