Kabkabuasan ni binmawag lad baley so balita ya akamayamay a silewsilew so anengneng ed kamposanto nen labin imbeneg.
Say kuanton may pangulo na Venerable Orden Ter ciaria so walaray anengneng ton mandarlang a kandila tan isasalaysay toy itsura tan kinakabaleg da, et agto labat nibagay karakel dan petepeteg, balet ta akabilang na masulok a duamplo. Si hermana Sipa, ya kailiay Cofradia na Smo. Rosario, inisip ton ag manepeg a paulian ton say makapangilastog labat ya akanengneng nian grasiay Dios at sakey a kailian na Moyong a kata gam; kanian anggaman arawi panaayaman to, imbaga to met ya akangel na paningel tan tagleey, ya abirbir to ni ingen so bosis day totoon nen arum iran panaon et . . . . balet ta lapod makristianon panangasi, aliwa labat lan pinerdona to la ra no agta idadasalan to ni ra ingen, tan sasakoban to lay kangaranan da .... ya nisesengeg ed saya, amin daray wadman ya akangel ed sikato apanmaliw dan santa ya tamtampol ed saman a bekta. Si hermana Rufa, diad katuaan anggapoy nangel to, balet ta agto met naako ya walaray nangel nen hermana Sipa et sikato et anggapo; kanian inkuan to met a diad kugip to anengneng toy akamayamay a kakamarerua na aliwa labat lan totoo ran inaatey la no ag pati saray manbibilay ni; saramay akaona, mapalaloy paniirap da, tan mikekerew iran may inapipiger ya inlilista tan pinabpalli ran indulgencia ya atiptipon ya agamoran to. Nayarian to met ya ibaga no siopa raman a kakamare-
