“No sikayon bukor, anggapo, balet ta no dakel iray iba yo, dakel met. Sinambot yo ya komon a inkagawa ya impangiter yoy pangaligan day arum a baley. Say pankatonungay baley manonaan, nen say andi kabaliksan a pakayari nen kapitan; gapo laman komon na sakey a maong a panaralan, et pinalabas yo.”
“?Antoy nagawaan ko bilang ed mangilalaman ed saray pansesengegay panagbilay tayon masegsegang ya andi kareenan tan panlalapoay takut tan pagpagan makagogonigon ed sikatayo ey? Anengneng yo lay ginawa nen Sr. Ibarra ya inmonor ed pananisiay karaklan. ?Say isip yo sirin manisia ed excomunion?
“Nandumaay kipapasen yo: si Sr. Ibarra labay toy mangipalakay a mantanem na maabig, tan diad panggawa to nia akaukolan ton intewek so inkasikato ya intukoy ed walan nayarian ton ikanan pangigapoan. Sikayo balet say nepeg yon gaween manyogayog, tan diad panggawa nia say nakaukolan say pangigapo tan say biskeg. Sakey ni say kaarap yon katulot aliwan petepeteg a si kapitan no ag say toon ikakana toy biskeg na pakayari ton pamaunong ed kapara ton too, say toon mandederal na kareenay baley, say toon onkokulang ed nabebetangan to; kanian agyo bukor komon ta say pakaliknay Baley natan sananey la ed samay liknaan to nen imbeneg a duamploy taon.”
“?Ontay pakaisip yo?” kuay tepet nen Don Filipo.
“?Agyo sirin nalilikas?” kuay ebat nen masiken ya imbangon toy daiset dimad dokolan to; “ah! manlapo lagid agyo anengneng so panaon a linmabas, agyo amurekdek so kabaliksan a ginaway inakar da dian impanayam na totoon taga Europa, say insabid diay balo ran libron babasaen tan say dilin yaakar day tubonbalo tayo ed Europa. Murekdek yo pa ta insan yo ipara: tua ta anggad natan manbibilay ni Real tan Pontificia Universidad na Sto. Tomas tan saray mangakabat a paparin manbabangat ed loob to, tan wala met niray matudion kanunotan ya andi tonda ran mansusokay na nandudumaay saya saman, tan manoukait na angatagey iran kakabatan, balet ta iner ni bilang so pakalmoan yo natan niran may tubonbalon katiempoan mi nen saman ya aral na abangonan, a papairapen dan popoutey utek dad panoukait tan panatalos day angaralein iran kakabatan,
