"Dinan a bansa ed Europa so sankagustoan yo ey?" tinepet ton may tubonbálon singa buek na mais so buek to.
"Ontumbok ed España ya kuintay komaduan báley ko, anggan dinan lan bansá ed Europa ya walad kawayangán."
"Sikayo ta dakdakel so naknakar yo . . . . . antoy anengneng yon mas makatawag na imano ey?" kuay tepet nen Laruja.
Singa nannunot si Ibarra.
"Makatawag na imano ed anton pamaakaran?"
"Singa bilang say bilay day binaleybáley . . . . . say panoulop day totoo, say polítika onó korang na uley, say pananisia. . . . say inkasikaran díli. . . . . say nantitipkelan da ra nian amin."
Nannunot ya abaybáyag si Ibarra, insan inkuanto:
"Diad katuaan anggapo met so anengneng kon makapakelaw ed nilnilak iran bansa likod labat bilang ed panangaro tan panangitagey ed báley a díli na sinansakey ed sikara. Kasakbayay yakar kod sakey a bansa, áralen koni awaran to, say ginapoan to onó exodo ton kuan, tan kayarik ed saya matintinonos ya anggapo lay derlawen ko ed nasabik; anengneng ko lawas a say bolaslás ono segsegáng daray kabansaan ontutumbok a lanang ed kawayangán man odinó guloy panagbilay da, kanian saraya wala lan lamang sirin ed saray atateng dan inmona, diad impangibágat dad inkasikaran dili ed kaabigay báley, onó diad impanbilay dan binobukor."
"Sikatotan labat so anengneng mo?" kuanton tekep toy elek na balaw imay pransiskano ya agnin balot sinmalitan nanlapod inggapoy pandem, ta say kanunotan to lági et walad panangán; "kawkawanan lay inabak mon pilak no sikatotan labat so naaral mo: anggan siopan ugaw a manmoteg ed eskuilaan amta to tan!"
Agagáy Ibarra ya sankanengneng ton agto amtay ibaga to; nikelawan met iramay arum tan ninengneng daran manbalbales a mapagpaga ran walay nagawan guló. "Nasusumpalay pandem tan nakselay Amá"
ikuan wari nen Ibarra et apokpokan toy inkasikato tan onia labat so balikas to:
