"Sinyoris, agyo komon pankelawan ya ontan lan madildíli rad siak di kúra mi nen saman. Sipor ya ontan dad siak nen ugaw ak ni, tan diad sikara singa ag onlalabas so panaon; pisálamatan ko balet ed sikaray baleg ta nanunotan kon malinlinew iray agew lan linmabas nen sikará et mabetbetbet iran ondadalaw ed abong mi tan papagalangan da kami ya mangakan iradman."
Pinasekiapan nen dominikoy matá may pransiskano tan anengneng ton manggiwgiw.
Inmalagey si Ibarra ya intuloy toy salita to:
"Abuloyan yo ak pa lan onalis, ta manlapod kasabisabik natan insan ompikal ak lamet nabuas a toltuloy, dakel niray gagawaen ko. Nasusompal met lay pandem, insan aliwa ak met a mainom onó maliket ed álak. Sinyoris, diad kaabigay España tan Pilipinas!"
Tinanggek toy sakey a kopitan álak ya anggad saman ag toni adiwit insan la inmalis. Samay tenienten masiken inalig to insan iman met la, balet andi esel.
"Ag kayo ni onaalis," kuanen Kápitan Tiago ya inesaes. "Onsabi lay María Clara ta inawit nen Isabel. Onla dia met so balon kúray báley yo ya masansantos."
"Onla ak dia nabuas kasakbayay isipot ko. Natan agko la naalagar ta walay dalawen kon mapilpilit," kuay Ibarra, insan imanla.
Samay pransiskano balet ibebesngaw toy petang na uló to.
"Anengneng yo la?" kuantod samay tubonbálon singa buek na mais so buek to, ya mangakaksion tan sankabenbenan toy yúron panagukis na bongabongán palamis. "Tagey na linawa tan! Agdala nitepel a nibano ray kura! Say pakaisip da atagtagey laran inkatoo! Sikatoy kaugsay pangibakid saray ugugaw ed Europa. Say Uley nepeg ton isebel."
"Si teniente ey?" kuan met nen Donya Victorina ya inabubonan to may pransiskano; "sanlábin asilot so kirep to, maong met ya imanla. Saman a kinamasiken to teniente ni labat so asabí to!"
Agto nalingoanay petang na uló tod impangalamit nen teniente ed kulet na buek to, tan say impakagatin toy dikola to.
