“Paulian yo la tay kawayan natan, sinyor; say nakaukolan so kelkelen yo ran amin so papipapil yo tan ombatik kayon ontaynan ed sayan bekta.”
Ninengneng nen Ibarray Elias a nikelawan, tan nen nahnano toy belat na lupa to nia naikbanan to may sankabenbenan to.
“Poulan yon amin so anggan anton makalanor ed sikayo, tan nakaukolan a diad loob na sakey oras akaarawi ki la dia, ya wala ki lad sakey a pasen ya anggapoy kapagaan yo.”
“?Akin ey?” kuanen Ibarra nen akasalita.
“Yatol yon amin a isiguro ray papablien yo.....”
“Akin lanti?”
“Poulan yon ami papil iran nansusulatan yo, ono naawat yo ran sulat — bengat lad tan ya andi kakabaliksan nayarin napikewet a nitalos ed aliwa......"
“?Akin, antoy makasengeg?”
“?Akin? Onaa ta asukayan koy sakey a nunong ya ipapakasalanan dad sikayo ya panderal.”
“Sakey a nunong? ya, siopay nannunot ey?”
“Agko apapaway no siopa; balet ta kapkapitongtong kod sakey ed saray masegsegang ya inopaan dan manumpal tan agkon balot napiing a nabaat.”
“Satay akapisalitaan yo agto imbaga no siopay mangoupa ed sikato?”
“On, tan inbilibilin ton agko ibesngaw; sikayo kono.”
“ !Dios ko!” kuanen Ibarra ya atalagnaw.
“Sinyor, sisia yoak, agkayo manaabala ta nayarin say gagala ran mauges a kanunotan et onterak ed sayan labi.”
Si Ibarra manmoldag iray mata to tan sankaakop toy uld to ya singa agto narerengel.
“Agla nabaat so gagala ra,” kuanen Elias ya intuloy;” atantan so impikabat ko, tan agkora kabat so mangipapangulo. . . . Iliktar yoy laman yo sinyor, yagel yoy inkasikayo ta nakaukolan kayoy dalin yon nianakan !”
“?Iner so batikan ko ey? Alagden daak ed sayan labi!” kuanen Ibarra ya sankanunot toy Maria Clara.
