“ !Anggan iner lan baley, diad Ibale, diad abong na anggan siopa lan makauley, balet ta arawi kayo, pian ag nibaga ya sikayoy mangikokurang na gaween da!”
“Et no siak a dildili mangidalem nitan a nunong ey?
“’Sikayoy mangidalem! kuanen Elias a ninengneng to tan akasuner; “ompaway kayon pakalala tan payoti ed mata ray akinunong, tan maletey a liknaan ed mata rad biek; nibagan kinalotan yo ra ya pangala yoy lupa, nibagan......”
“?Anto sirin so gaween ey?”
"Imbagak lad sikayo: poulan yon ami papipapil iran walay akikalamitan dad sikayo, batik kayo, tan alagar yoy onsabi......”
“?Si Maria Clara ey?” kuanto; “Ag nayarin ontaynanak, lablabayen ko lay ompatey!”
Niyesyes nen Elias iray lima ton dili tan nankuan:
“ !No ontan sirin samben yoy onsabi, paraanan yoy pangidalem dad sikayo!”
Lingawlingaw si Ibarra ya agto amtay gaween to.
“Ibaan yoak sirin; ditad saratan a carpeta ay wad tan iray sulsulat na boleg mi; pili yo ray sulat di amak ta nayarin sikaray makalanor ed siak. Basa yo ray nanpirma.”
Tan si Ibarra ya singa altoy atiweng tan singa bakol so uld to, lukas dia kapot dimay gagaween tod saray kajon, kekelkelen to ray papipapil, babasaen to ran masigsiglat, pipilaten to ray arum, yaatol to ray arum, walaray aalaen ton libro, bubokayen to ra, etc Si Elias ontan to met, anggaman ag unong nalalagaan, et mapalaloy seet to met balet; kasanlilikna, akatonda, linmirag iray mata, telek a telek ed lima toy sakey a papil a sankaegnaan to tan tinepet tod bosis a manggiwgiw:
“?Kabat na boleg yoy D. Pedro Eibarramendia?”
!Anto sirin ey!” kuanen Ibarra ya peles ton manlulukas na sakey a kajon tan mangekelkel na sankabunton a papil; “lakik ed pueg!”
“Laki yod pueg si D. Pedro Eibarramendia?” kuan lamet nen Elias a tinepet ya amespesiaw tan abaliw so lupa to.
