"?Sugatan si alferez?” kuanen Linares ya a kasalita; " ! !Ah ! !”.... Tan natan to labat naimano ya aseksek ni manayay sangito.
“Pari kura, galila! Anggapo lay kaatapan!” kuan lamet nen alferez a makmaksil so sangi to.
Si Pari Salvi pinmaway dimad inamotan to ya mapalaloy pesiaw na lupa to, tan linma lan inmakseb.
“Saray tutulisan pinatey day allferez! Maria, Sinang, mantalak kayod silir yo! kyrie eleyson!”
Si Ibarra amaarap met ed takayan ya anta popokpokan a pilit nen Tia Isabel.
“ !Agka onaalis ta agka nankonpisar, agka onaalis!” kuanton ipapasout, ta kaaro ton maong si ina to nen mabilay ni.
Si Ibarra balet inlulot toy imanla; say pakalikas to mantetlek so amin a kaliberliber to ya singa anggapoy gagatinan ton dalin. Mangganunggong iray layag to tan saray salt to ambelabelat iran ngalngalin agtora naalsa tan agto napetek so akar to; singa dalay pakanengneng to, ya mansubsublayan ed mata toy bilunget tan liwawa, tan anggaman managaag so bulan natatalapos to ray batobato tan puteputer na kiew dimad lansangan ya anggapon balot so katoowan.
Dimad asingger ed kuartel anengneng to ray sondalon akaparaay bayoneta ra, balet ta akalabas ya agda naimano ta mantotungtong iran mansasangsang. Di mad tribunal sankarengel iray pekpek, ingal, panayay, ayew tan samba, ya say sankaksilan say bosis nen alfe rez. a tabontabonan ton amin: "!Diad cepo! Posasan yo ray kalimaan da! Paltog yoy anggan siopan onggalaw! Sargento, idatak yo ray guardia! Sayan labi anggapoy manpapasiar, ni say Dios! Kapitan, agkayo onoogip!”
Sinigsiglatan nen Ibarray nanakar ya inmarap lad abong, tan asabi to ray ugugaw ton mapagpaga ran tatalaranan da.
“Silyaan yoy sankaabigan a kabayo, insan kila onogip!” kuanton ingganggan.
Linmad man ed silir a panagbasaan tan aralan to, tan masigsiglat a mangipaparaay sakey a maleta. Nilokasan toy sakey a kajan balatyang, kinelkel ton amiy kuartan wadman tan inseksek tod sakey a sakon melag.
