Maong ingen ta asambot to, ta saramay guardia ci vil ipapasout da lay onloob.
“Pasegep yo kami ta alaen mi ray papipapil nen katawan yo!” kuanen directorcillo.
“?Walay abuloy yo?” kuay sakey a masiken; “no anggapo, agkayo onsesegep.”
Saramay sondalo impaliis dan pinepekpek na putay pusil da, insan lara sinmegep, balet ta inabet la ray makapakapal ya asewek a kinmayat lad amin a pasen a bansag na andurukey tan ankakabaleg iran dilay apuy a manlalapod man ed salas, a didildilan tan babalkuten da ray kapukaput day pinto tan dorongawan.
“!Poul! !Poul! Apuy!” kuay dengdenglen ya ingal.
Batik iran amin iramay igaganggan nen Ibarra ya mangilaban na nayarian da, balet ta akasabi lay apuy ed samay melag a silir a kimeyan nen Ibarra tan pinmapaltog ya amin iramay wadman a nambabangil ya ikakana to. Akasuner ira may guardia civil ta sinaraan iray apuy a mandanoldol a papalaniten ton amiy walad nadadalan to. Ag makakayay danum ya aasolen dad bobun ; maningal iran amin ya onkekerew na tulong et ang gapo ray kabkaabay da. Samay apuy tinmayak lad amin a pasen tan mandayabdab ya anggad tagey na atep a tekep na makapakapal a likewlikew ya asewek. Mandarlang lan amiy pasen, tan samay dagem ya ampetapetang manpeles met so siplog to; nitan la ran manbagtik so arum a taga uma et anganggaay agawaan da so nanbantay ed samay makapataktakot a talaksan a manungol ya angalpong ed samay abong a daan anta ginalang ya ag diniwit na dagem may danum, karol may yegyeg
ed andukey a panaon.
