Pinmelnak a siansiay liwawa ed samay baley a mapalaloy inkatalagnaw to.
Dimad lansangan a kawalaay kuartel tan tribunal anggapo ni nanengneng a too; saray kaabongan, akakaput niran makenekeneng. Ontan man, linmukas ya akalarakar so kaput a kiew na sakey a dorongawan tan dinmonglaw so uldy sakey ya ugaw a laki ya lingawlingaw, intangolaw toy beklew to ya onnenengneng ed amin a pasen !plas! kuay tanol na katat a dinmapod laman, kinmuliseng si ugaw, linmikdem, sinmelek, tan kinmaput lamet imay dorongawan.
Wala la balet so pangaligan; samay inlukas tan inkaput na dorongawan, walara angankoy akangel, ta linmukas met a nankalkalnay sananey a dorongawan tan dinmonglaw a singa mapagpaga so lupay sakey a akulaw ya akumanet tan ngileb: si dili yan Hermana Pute ya saya may nangguldd simbaan nen mansisirmon si pari Damaso. Saray ugugaw tan akokulaw sikara lawas so sankausisaan diad tapew na dalin, saramay inmona diad pilalek dan makaamta ono mikabat, tan sarayay komadua diad pilit da balet ya ag makalingoan.
Anggapo angankoy ontalek a mamalalpak ed sikatoy sinilas ta wadman ya ag sinmelek, binantag toy arawi tan sinilot to ray kirep to, nankomokomo, linmukdan makmaknol insan angorus. Dimad kaarap ya abong linmukas met a nankalkalnay sakey a dorongawan a melag tan tinmandag si Hermana Rufa, samay akulaw ya ag mansaol tan agmet pasaol. Nannengnengan iran
dua, akaimis ira, nansinyasan ira, insan iran dua angorus.
