“Kasi met la a!” kuay sakey a masiken, samay asawa nen Pute.
"!0n, kasian mo!” kuanto nian inmebat; "nengneng mo balet ta karoman agto initday misay kamarerua nen ama to anta mas so pankaukolan to anganko nen saray arum.”
“Agay ka met lan bii a, anggapo siri panangasim.........?”
“ Panangasi ed saray excomulgado? Say kuanday kura ta kasalanan so mangasi ed saray kakabusol na Dios. Agyo la nanunotan so itsuray impanakar tod man ed kamposanto ya alabas nen walad koral day ayep?”
“Eh, nanpara met la balet so koral a pokokan day ayep tan say kamposanto.” kuanton inmebat nimay ma siken; “say pandumaan da labat ta diad samay inmona ay saksakey a nengneng na ayep so ontutubong..........”
“!Dali!” kuanen Hermana Pute ya iningalan; "yalibansam ni anta malinlinew lan sankanengneng a dudusaey Dios. Say dakel inerel da ka met! Tukol moy abong a natotumba!"
Agla inmesel si asawa to ed sayan panagkatonungan.
“ !Panon ta!” kuanen akulaw ya intuloy "kayari ton pinekpek si pari Damaso, kulang labat lay pamatey tod kinen pari Salvi!”
"Agmo met balet napaandi ya nen ugaw ni et niaong.”
"On, maong nen saman,” kuay ebat nen akulaw; “balet ta linmad Espana; tan amtam lan amin ya oonlad Espana manmaliw a hereje, ontay kuan day kura.”
“!Eje?” kuanen asawan laki ta anengneng toy pakabales to; “si kura ey, tan amin day kura, tan si Arzobispo, tan si Papa, tan say Virgin ey, aliwa ran taga Espana? !antoy agawam! hereje met ira a? Panon ka?”
Kapalpalaran nen Hermana Pute, ta nitan lan manbagtik so sakey ya ugaw dan bii, ya ataktakot a singa pineresan so lupa to, kanian apultot so sangsangan..
"!Walay inbitay dimad kaabay a tanamanan!”
kuanton mandongap.
