“Walay inbitay!” kuandan amin a napnoy kelaw. Angorus iramay bibii; anggapoy ni sakey ya akagalaw ed kawalaan to.
"On, mama,’’ kuanton intuloy nimay igaganggan a mangigiwgiw; “manboborborak lawari baktaw linmingawak dimad biek a tanamanan a nengnengen ko no wadmay anengneng koy sakey a lakin manbayes; inisip ko si Teo, samay igagangan met a mangiiter ed siak a lanang na ... sinmingger ak a .... mangalay baktaw insan ko anengneng ya aliwan si Teo no agta sananey, ya inatey; batikak lan batik, tan. . . . ”
“Itila ta nengnengen tayo, kuanen masiken ya inmalagey; "itoro mo kami.”
“ !Agka oonla!” kuanen Hermana Pute ya maingal, tan impuger tod aysing; “Walay onsabid sikan segsegang! Inbitay toy laman to? Pera to, akauley tod tan!” “Agay ka lan bii, paulian moak labat kari ta neng nengen ko. Laka, Juan, ta ipakabat mod kuartel; aglapiga no ag met ni inatey.”
Tan iman lad man ed kaabay a tanamanan a manomtumbok imay ugaw dan bii ya onsasanib ed sikato; saramay bibii ya pati si Hermana Pute lan lamang tinmonbok met ira ya natatakut balet napno ray usisa.
“Niman, mama," kuanton may igaganggan a tinmonda tan inturd to.
Anonda ran ag lara sinmingger a maong a pinaulian da la may masiken a tinmuloy a bukor.
Manbitbitin so sakey a too ed sangay sakey a pan to! a manbaybayes na daiset ta sisipsiplogey dagem. Inimimano nen masiken ya abaybayag; anengneng to ray sail ton mataltalker, ontan da met iray lima to, say kawes ton kapipitek, tan say uld ton akatewek ya alekne ed beklew.
“Ag manepeg a diwiten anggad isabi justicia,” kuanton inkasil; "tinmalker la; mapatpatnag ya abayag lan inatey.”
Nankalkalna ra may bibiin sinmingger.
"Saya may toon manaayam ed samay abong a melag diman ay, a duay simba la angankoy insabi to dia; nengneng yo pa tay piglat ed lupa to ay.”
“!Ave Maria!” kuanda ran may arum a bibii.
“?Idasalan ta yoy kamarerua to?” kuay sakey a biin tubonbalo nen kayari ton ninengneng ya inimanon
maong.
