"!Bantiwel, hereje!” kuanen Hermana Bute ya pamapasnokan to; "agmo amta sirin so kuanen pari Damoso ? Singa kabaliksan toy tutoksoey Dios no idasalan so sakey ya akondinan naplag ed inpiernos; ta say nanbitkel nakondinan andi saew, kanian ag ikokotkot ed pasen a sagrado ”
Insan to intuloy ya inkuan: “Kuanko la et ta singak la sankanengneng ya aliway kasumpalan ton tan a too; agkon balot apapaway no iner so pangaalaan toy panbibilay to.”
“Anengneng kon amidua ya mitotungtong ed kinen sakristan mayor,” kuay sakey a biin tubonbalo.
"Anggano ni, aliwa angankon papaibagan labay toy mankonpisar, ond mangiter na misa.”
Dinmadago ray kabkaabay tan akumpog na totoo may bangkay a wadman nin manbaybayes. Kalabas na kapalduay oras sinmabi sakey ya alguacil, si directorcillo tan duaran cuadrillero; sarayan dua inepas da may bangkay ya inggaton ed camilia.
“Maganat iray totoon ompatey,” kuanen directorcillon manelek nen aaleen toy pluman akasamping ed layag to.
Makapalikdo ray tepet to; sinalaysay to may igaganggan a bii ya inelew to, inkukulirep to, minumuldagatan to, pinapagiaw to, impapasalita toy pati agto imbaga, ya diad baleg a takot nen bii ta inisip to lan iseksek dad pangawan, ginapoan toy manangis ya asabisabin impatua ton ag linman manborbor na baktaw no aeta .... insan to pantatasiey Teo
Kaleganan to nia, sakey a taga uma ya nantakokoy balbaleg tan walay malaplapar a patsi ed beklew to, sinmingger met ya akibabalin mannenengneng ed samay bangkay tan samay lubir. Say lupa ton may inatey aliwan mas asireg nen say entiron laman to; dimad tagey na siknol na lubir ed beklew sankanengneng so duaran agulilis tan duara met ya ankelag a biler ya asireg; saraman balet so agasgas na lubir, malinglinggas iran ampotipoti ya ag ira dinmala. Saman a mausisan taga uma kinonineng ton maong so aysing tan sanual ton may bangkay, tan naimano ton napno ray dabok tan walaray pilatpilat a mapatpatnag a kapilpilat dani; sa balet so akatawag a maong na imano to say mapalepalet a sisipot a pinmepeket ya anggad lew
lew na aysing to.
