“!Aon yo!” kuanton inganggan a bigla kalabas na kapalduay minuto.
Say balakebek na danum ya ompapawil a napepelag so angipakabat a samay dinusa et akalimuas lan akapawil ed liwawa. Maniapod ambelat so manedetdet ed pagpag masigsiglat so imbolso tod tagey, tan saray asagorsagor ton batobato ya karaklay mautok tan makmakdem a naaknit irad man ed dikidiking na bobon, mapalatapat iran makmaknol a napapaktak.
Binmutay si Tarsilo ed mata da ran may andi esel a totoon wadman ya akuyapotay muling tan buek toy pitek a makarimdimla, asugatsugat agargargar so lupa to ya manterter so danum ed kalamanan to tan mantayegteg nen asiplog na dagem.
" Labay moy mandeclara?” kuandad sikaton tinepet.
“ !Agmo papauliay agik!” kuanton makalkalna ya nengnengnengen to tan mikakasi ed samay sakey a cuadrillero.
Inmateet lamet imay aksiw tan naandipat lamet imay dudusaen. Sankanengneng nen Donya Consolacion ya iimanoen imay danum a malinlinak. Si alferez nambilang na sakey a minuto.
Nen binmutay lamet si Tarsilo say lupa to kinmunet ya asireg. Inparlas to ray mata tod saray wadman tan agtora inlikdem no agta akamulagat iran singa kolor na dala. “?Mandeclara ka?” kuan lamet nen alferez a tine pet a nakalan lay ilalo.
Pinmeyeng si Tarsilo tan inlosor da lamet. Mankopit iray lukablukab to, saray ugawugaw day mata to balet tangtangayen da nin siansiay tawen a panparpaliran day singara kapes a lurem; itetewek toy uld to ta aaboten to nin nenengnengen so liwaway agew balet ta nipalgep la lamet tan samay sankarumsisan a telon sinaniban to lad mata ton aminpinsan so amin a wadiad tapew na dalin.
Linmabas so sakey minuto; anengneng nen Musa so ankakabaleg iran buran manlalapod dalem ya ontatagey
a onleletaw ed tapew na danum.
