"?Antoy anapan mo?”
"Managbunot na niog, sinyor, tan ugaw nen katolangan ko.”
“Siopay angiganggan ed sikayon looban yoy kuar tel?”
"!Anggapo, sinyor!”
“?Antotay anggapo? Agka mantitila, no andi ipalebleb da kad man ed bobon. ?Siopay angiganggan ed sikayo? Ibagam so tua!”
"!Say tua, sinyor!”
"?Siopa?”
"!Siopa, sinyor!”
“Tetepeten kod sika no siopay angiganggan ed si kayon onalsa.”
“Anto tay onalsa, sinyor?”
"Satan so akasengeg na inkiwalam dimad patio na kuartel.”
“!Ah, sinyor!” kuanen Andong a binmalangay lupa to.
"Siopay akankasalanan ed satan?”
"!Si katolangan ko, sinyor!”
Nikelawan tan akalek ira lawarin amiy wadman. Tinmonday alferez ed pamaspasiar to ya ninengneng toy masubesubeg, tan samay too ta inisip ton apaknaan day inbaga to, apabiskeg toy linawa to tan intuloy ton nankuan:
“On, sinyor; say ipapakan nen katolangan kod siak saray abulok, abangles ono anggapo lay kana; kalabian nen onlalabas ak dia, sinmikal a maong so eges ko, alingawan ko may patioy kuartel tan inkuan kod inkasiak: ‘Labi, anggapo lay makanengneng ed sika!' Linmoob ak insan nen onaalagey ak la, mapalakapak so paltog; ikokoldon koy sanual ko, sinyor.....”
Apultot so salita to ta sinikdakan day babuyan.
“!Yakar yod pangawan,” kuanen alferez ya ingganggan; "tan naani no ngarem diad Cabecera!”
