Agangganon binmawag ed baley so balita ya ipikal da la ray periso. Kalabas na inkatalagnaw day totoo ed sayan nangelan da, ginmapo la ray akis tan tagleey.
Saray boleg da ran may periso, batikbatik ira kalamor a singa ra ambagel; manlapo rad konbinto onia rad tribunal, tan nen anggapoy naalagar dan mogmon ligliwa ed iner man a pasen, ginapoan da lay mantagleey. Si kura nantalak ed silir to ta agmakayari; si alferez pinanoan to ray guardia, ya saraya susonsunen day putan na pusil da ra may mikakasin bibii ya agda ra paasinggeren; si kapitan ya anta sipoi’ lan anggapoy nagagawaan to, lalon namamanga ya nanmaliw ya ang gapoy kabaliksan ton too. Dimad arap na pangawan batikbatik irad biek tan biek iramay bibiin agnira naupotay biskeg; saramay alopok lay laman da, inlespak da la kalamor dimad dalin a mannangnangis tan pibitla ray ngaran da ray pinabli ran totoon inkulong.
Kapkaptangan lay agew et anggapoy anggan siopad sikara ya malabay ya onalis. Si Doray, samay masaysayasak tan malikeliket warin asawa nen Don Filipo wadman ya akarakar a mapalaloy ermen to ya sankaeba toy an-ak ton melag tan mannangis iran dua.
“Pawil kila,” kuandad sikato; “ta ompan napetang itay anak yo ay.”
“?Anenen to met ni manbilay no anggapo lay ama ton mantagano tan mangibangat ed sikato ey?” kuay ebat ton anggapoy makaligliwad sikato.
"Anggapoy kasalanan nen asawa yo; anganko makapawil.”
“?Kapigan ni ey, sano inatey ka mi la?”
