lamparilyan lata ya silew da ran may lakoan day bibiin managtinday kakanen tan ponti.
"Makapakelaw" kuanto lamet; "pitoy taon lay linmabas saya nimay intsik a nanenengneng ko dia, tan sayay akulaw ay . . . . sikato met niya man! Singa bilang kinogip ko labat ed sayan lábi so pitoy taon ya impanayam kod Europa!.... Tan..... Ay, Dios ko! agni naapiger imay batón tinaynan kon aderal!"
Wadman nin tuá man a batón atebag dimad gilig na lansangan a nanpegleyay lilikoan a mamaarap ed saray lansangay S. Jacinto tan Sacristia. (2)
Legan ton maniimimano na makapakelaw ya ag kakauman na bilay na sakey a siudad ed sayan bansan andi kaligenay bilay onó antokaman, alikas toy sakey a liman ginmaton a makalkalna ed abalá to: intangwa toy lupa to tan wadmad abay to may masiken a teniente ya sankanengneng ton makakaimis: anggapo lamay lupa ton ambilbilunget a mabinbinta tan ag met la asilot so kirep to.
"Kaaro, manasikaso kayo! Panmarmaran yoy inkagawa nen amá yo!" kuanto.
"Itepel yo ak pa, say pakaisip ko so pinablí yo ran maong di amák. Nibaga yod siak no antoy adatngan dan kapalaran?" tinepet nen Ibarra ya sankanengneng toy masiken.
"Anto? agyo amta?" kuay tepet met nen teniente.
"Tinepet kod kindi Don Santiago, balet say kuandan panungtong dad siak nabuas. Amta yo pa lagi?"
"Anto sirin ey, singa pakaamtay amin a too! Inatey ed pangawan."
Akasuner si Ibarra tan sineleng toy tenienten tineregan.
"Diad pangawan? Siopay inatey ed pangawan?" kuanton tinmepet.
"Saló, si amá yo ta apiriso!" kuay ebat nen teniente ya singa mankelaw.
"Di amák.... wala rad pangawan. . . . . ya apiriso ra? Antoy ibábaga yo? Kabat yo no siopay amák?
(1) Pinpin so ngaran to natan.
(2) Ongpin natan.
