Amta yo..... ?" kuanen Ibarra ya binenbenan tod taklay imay teniente.
"Agak pa anganko nalilingó, si D. Rafael Ibarra."
"On, si Don Rafael Ibarra!" kuanen Crisóstomo ya inoman ed makapkapoy a bosis.
"Say inisip ko amta yo la!" kuanton may tenienten makalkalna ya akasibeg nen atalusan toy nagagawa ed loob nen Ibarra; "alutolutod nunot ko balet ta pabiskeg yoy linawa yo! Dia anggapoy toon maptek a panagnunot ya agto atubong so pangawan."
"Amtak ta agyo ak lulureyen," kuanen Ibarra ed bosis a makalna, kalabas na abayag ya agto impakasel.
"Nibága yod siak no akin et wala rad pangawan?"
Singa nannunot si masiken.
"Mankelaw ak no akin et anggapoy angipakabat ed sikayoy agawgawad boleg yo."
"Say unor a sulat di amák ed siak sakey taon la natan tan diman da ibabaga ya agak mapaga no agda ak nasulat ta dakel so gawá ra: bibilinen da ak a manaral a maong. . . . bibindisionan da ak."
"Sulat to tan ed sikayo sirin kasakbayay impatey to; ta kulangkulang lan sakey taon natan so impangiponpon mid sikatod man ed báley yo."
"Antoy akasengeg na apirisoan di amák ey?"
"Sakey a makasengeg a napnoy kagalangan. Nakaukolan koy onlad kuartel kanian manulop itila tan tungtongen ko legan tayon manaakar. Peket kayo diad taklay ko."
Nanakar iran aganó ya andi esel: samay masiken singa mannonunot ya apaplosen toy balbas to.
"Unong na kabat yon peteg," kuanton ginmapó, "si amá yo so sankayamanan ed lúyag tan anggaman dakel so mangaaro tan mangagalang ed sikato, wala ra met balet so mamubusol tan manisiblet. Sakey lantin makapasinagem a nagagawa so aliwan amin kamin kakastila ya linma diad Pilipinas et gagaween mi kanepegan mi: kuanko ya, ya aliwan akagapoy kakabusol nen amá yo labat no ag sakey a láki yo met. Say mabetbet a salat na onla dian manuley, say kadederal dad bandad tagey, say panagpalabí, say ganó tan mora na
