‘‘Samay eskuilaan baraan labat iman; say nunot
tan talagan ipaalagey say pandipensaan to no labanan
tayo.......... ”
“Jesus! Anto lan kamuanan! Bukor na indio so makanunot nitan a kapayotian,” kuan ton may mataba. “No siak labat so Kapitan General, nengnengen da no.....nengnengen da no.....”
“Ontan ko met!” kuanen mabeng ya inmarap ed samay pukol. “Erelen kon amin iratay mankabatkabatan ya abogado, paparin andeket, komersiante, tan andi s.tlaysayan ipaalis ira odino pateyen ira. Pian naerep so sakey a kaugsan nakaukolan a kutkoten ya anggad lamot!”
“Say dengel so saya konon filibustero walay dala ton kastila!” kuanen pukol ya anggapoy petepeteg a sineleng to.
“Sirin?” kuanen mataba ya ag balot atalagnaw; “sara lawas so mestiso! Ta no indio agto nagawat a nunoten itay mangibalap na gelew. Mangiwi ka ray wawak.....mangiwi ka ray wawak.....” (1)
“?Amta yo no antoy nangelan ko?” kuay tepet na sakey a mestisa ya insalet tod salitaan. “Say asawa nen Kpn. Tinong nanunotan yo? saya may akanabong ed nandeman tan nansasayawan tayo nen pistay Tondo.....”
"Samay walay duaran marikit to? Eh, anto ey?”
“Samay asawa to nirigaloan toy Kapitan General natay ngarem na sakey a singsing a brillante ya manbili na sanliboy pisos!”
Pinigaran nen pukol.
"?Tua tan?” Ya, akin ey? kuan ton tinepet a kinmidiam iray mata to.
“Say kuanen bii ta pinagka rigalo konoy Pasko....”
“Masulok nin sakey bulan balet so Pasko!”
“Mapagpaga angankon naabot na binakbinak ya uran. . . . !” kuanen mataba.
“Kaniantin onsisirum,” kuan ton inarum nen mabeng.
“!Say manpapaliwawa anta ag tetepetan, kabaliksan toy mangaakoy kasalanan!”
________
(1) Sakey yan alimbewa ed Kastila: “Cria cuervos y te secaran los ojos.” Onia ed Pangasinan: Mangiwi ka ray wawak to pian sukiten da ray matam,” a say labay ton ibaga so ag manepeg a kasiay toon malamang ta balesen to
kay manges.
