panagbaroy ya onarap dia, sikara yay pansesengegan. Amin iray mauges a tood España onla ra dia, tan no walay nibalsak a makakar dian maong, deralen lan lamang na dilin bansá. Sikaton dakerakel so mamubusol ed kinen amá yo ed saray papári tan kakastila."
Tinmonda dian aganó.
"Pigay bulan ed insipot yo ginmapó laray siblangan da nen pári Dámaso, ya agko atebek so petepeteg a makasengeg. Si pári Dámaso ibábaga ton ag mankokonpisar si ama yo: ag met balet mankokonpisar a si por et nanunotan yoni anganko ya masiadoy impankaaro ra. Sakey ni, si Don Rafael sakey a toon napnoy galang tan lalo nin maptek ed panagnunot tan kagagawa to nen saramay arum a konpisar laran konpisar. Say totuntonen ton ugáli tan pikokuno ed saray kapara ton totoo mapmaptek, tan oniay ibabága tod siak no nasalsalita toray irirap na linawa to: 'Sr. Guevara, diad isip yo pirdonaey Dios kasí so sakey a kasalanan, singa bilang pamatey na too, ed pangibagá labat ed pári, ya anggapoy pagpagay mangibagá ta amta lan say pári et agto nibagay kasalanan ya inkonpisar ed sikato, tan nisengeg ed takut labat na kakalot ed inpiernos a tatawagey acto de atricion? Anta payoti la lanti manggawa nia, anggapo ni kababaingan to ta say labay to walad siguro. Siak sananey so pakaisip kod Dios, diad panagnunot ko ag napaabig so sakey a mauges ed panggaway sananey a mauges, tan ag met napirdona ed konwarin pannangnangis tan pamayabol ed simbaan!' Tan oniay alimbawa ya inter to: 'No pinatey ko bilang so sakey ya amá, no nisesengeg ed siak abaloy sakey a bii ya apasegsegang, tan naulíran naandiay manlegpet tan mangasikaso so ugugaw iran malikeliket warin manbíbilay, apaliket ko la kasí andi anggaan a Tonung ed pangibitay dad siak bilang, pangibagak na yaamot ko ed sakey ya amtak a petepeteg ya agto nibesngaw, pangiter koy payabol ed saray papári ya agda met nakaukolan, panaliw koy bula, ono pannangnangis kon labi agew? Si baló tan saray naulila ey? Say ibábagay konsiensiak onó pakatalus koy maong tan mauges, kaukolan a sandian kod anggaay pakayarik si toon pinatey ko ed kaabigan tonyan boleg a siak so akapasegsegang; ya anggano ontan ni, siopay makapangiter ed sikara
