"?Agmakayari ka anako? Akin et makulkulaney
kan singa anggapoy pukel mo a? Antoy agawam?”
“Nanaelew ak ... say karakel na too diad salas ... .. .tan say liwawa ... nakaukolan koy manpainawa. Ibaga yod kindi Ama ta iyogip ko.”
"!Ambetebetel ka! Labay moy tsa?”
Impey eng nen Maria Clara; inkaput toy pintoy silir to ya tinumbokan, tan diad kapoy to, inlespak to lad mad tabla ed petek na sakey a talintao tan manogaog a nankuan:
“ !Ina, ina, inak!”
Say liwaway bulan ontutubong dimad dorongawan tan pinto ya onarap dimad batalan a bato. Saray musiko anggapoy tonda ran manotugtog na malikeliket iran valse tan onsasabi met ya anggad man ed silir toy elek day totoo tan say dalamurum na tungtongan; nambabales iran linmad man a tinmoktok di ama to, Tia Isabel, Donya Victorina tan pati si Linares, balet ta ag ginmalaw si Maria Clara, tan wadman labat a maningel tan mansibsibek.
Linmabas so oras; asumpal lay sayaksak tan tanutanol ed lamisaan tan sankarengel so pansasayaw day totoo; nankalkalnan naopot tan narep imay silew a kandila, si Maria Clara balet wadman nin ag onggalagalaw ed tabla ya sinsindagay bulan dimad petek na talintaoy Ina nen Jesus.
Nankalkalnan dinmeen so abong, narep lan amiy silew, tan pinmawil lamet si Tia Isabel a tinmoktok di mad pinto.
“!Naugip la said!” kuanton inkasil; “ugaw ni insan anggapoy sakit na uld to kanian naugip a singa bangkay!”
Nen anggapo lay onkitakitaw, inmalagey si Maria ya matantantan, linmingaw ed biek tan biek, tan anengneng to may batalan a bato tan saramay palapalan ankelag a naames iray maerermen a sinag na bulan.
"!Mareereen so arapen a panbilay! Naugip a singa bangkay!” kuanton makalkalna ya inmarap dimad ba talan a bato.
Naugip so entiron siudad; anganggad narerengel say mataltalag iran luganan ya ondadalan ed taytay a
kiew dimad ilog a sankanengneng ed malinlinak a danum toy aninag na bulan.
