Kakalkalnaan nen Ibarra ya pepeklaen iray lima to.
“Agak dia linma ya mangukom ed sika ... linmaak
dian mangiter ed sikay kareenan.”
"Agko kaliktan itay kareenan ya iiter mod siak; say kareenan nayarian kon iter ed inkasiak a dili. Amtak a mumurmuraen moak tan satan a panlemlemew mo panmaliwen ton ampait ed siak so pati ipapatey!”
Anengneng nen Ibarra so inkaandi ilalo tan ermen ton man a pangaskasiyan a bii, kanian tinepet to no antoy labay to.
“Say panisiam ya ag balot naoman so panangarok ed sika!”
Akaimis na ampaipait si Ibarra.
"!Ah ! panduaruaan moak, panduaruaan moy kasiporan mon kaaro ya nanlapod inkaugaw, ya anggapon balot so inamot tod sikan anggan saksakey a kanunotan to!” kuanen Marian napnoy ermen. “Natalusan ko may liknaan mo ! Et no narengel moy bilay ko, say sankaermenan a bilay kon naamtaan ko nen mansasakit ak, onsabi angankoy panangasim tan agmoak imisay ontan ed onialan kaermenan ko. !Akin et tinambal moak ni ya agmoak la pinaulian ya inatey ed lima ton may mureng a doktor a manatambal ed siak! Mas maliket ita la laingen komon!”
Nanpainawan aganoy Maria insan to intuloy na onia:
“!Ginabay mo, ta panduaruaan moak! Oy la komon no perdonaen nak nen inak. Diad sakey ed saray sankaermenan a labi ed impansakit ko, imbagad siak na sakey a laki so ngaray amak a peteg, tan insebel tod siak so arum . . . anggad ag si amak a dildili so mamerdonad sika ed impakalames mod sikato.”
Akasuner si Ibarra tan ninengneng ton napnoy takut si Maria.
“On,” kuanto nian intuloy; "saman a labi imbaga tod siak ya agto nayarin yabuloy so pankasal ta, ta sungpa ed konsiensia to, tan napasout a mangipalapag ed inkagawa ya anggan antoy kabaleg na eskandalon nagawa ta say amak et si . . .”
Insan to inesaes ya inopit ed Ibarra so sakey a ngaran ed ontan lan kalna ya saya labat so akangel.
“?Anto ni gaween ko ey? Manepeg kasi ya ibagat
kod arok so pakanunotan ed kinen inak, say galang na
