Anggapoy kabaliksan day nantatabonan larad lamisaan a mararakep iran rigalo ed bansal; ni saray alajas a brillante ya mankidiam ira ed kajon daran terciopelo, ni saray binobordaan a pinya, ni saray nambabangil ya abel iran sutla, agda naayat so ilimgis nen Maria Clara. Wadman kalamor a teregtereg so mata to ya agto nanenengneng ni nababasa so palapagan a walad arap ton mangibabagay impatey nen Ibarra ya nalner ed libsong.
Biglan alikas toy duaran liman amepet ed sandua toran mata, tan nangel toy bosis a masaysayaksak nen pari Damaso ya nankuan:
"Siopa ak? Siopa ak?”
Akaluksod panyoryurongan toy Maria Clara tan ninengneng ton napnoy takut.
"Bantiwel, ataktakot ka, anto? Ag moak tatalaranan, awa? Nanlapo ak ed luyag a mibansal labat ed sika.”
Tan sinmingger a manimimis na nagnagnap, tan inderew toy lima to ya manpapinsiw. Sinmingger met si Maria Clara ya manggiwgiw, inawat toy lima nen pari Damaso tan inangoban to ya magalgalang.
"Akin ka, Maria?” kuanen pransiskano ya abalang so imis ton malikeliket tan sinmalat so paga; "singa ismay so limam, tan amespesiaw ka ... agmakayari ka, anako?”
Tan si pari Damaso inamoyot ton insingger ed sikato ed onman lan panangaro ya ag ililaloan ed liknaan to, binenbenan tod duaran lima ya sankanengneng ton singa onteleper.
"Anggapo lay konpiansam ed kinen padrinom?” kuanton tinepet ya ontutoring; “gala, yurong ka diad
abay ko tan tungtong mod siak no anto ray irap na linawam a singa gawam nen ugaw kani, no nakaukolan mo-
