ugaw a manourong ginapoan toy manelek tan sinisinyasan toray ibiba ton arum ya ugugaw ya itoturo toy tamoró to. Sikato sankarengel toy elek da, sankanengneng to met so lurey ed kalupaan daray wadman; apultot so ános to, pinmigar a biglá tan inusilan to ramay ugugaw ya inian day kuyat ya ibanbando ray ba be bi bo bu. Akuliteptepan, tan lapod agto ra naabot tinopak toray baston to, nakna ton asugatay sakey ed uló tan atumba, binatik ton dinagó insan to ginagatinan, tan amin daran may wadman a manlulurey ed sikato, anggapoy akapanpuson sinmingger. Ginaway mauges a kapalaran a linmabas dimay amá yo. Nen anengneng toy nagagawa pinmetang so uló to, binatik to may kobrador, binenbenan tod taklay tan nanpasnokan to. Samay sakey ta ambalanga la angankoy pakanengneng to, inandawesan ton kabilen, si amá yo balet ag impaunaan, tan diad biskeg ton pakapatnagay impiláki tod saray Vascongados(1)..... say kuanday arum ta kinábil to, saray arum so intolak to labat; say kuestion so samay too mantongging insan atumbá ya nikenay uló tod bató. Si Don Rafael inalsa ton anggapoy pagpága may ugaw ya asugat tan inawit tod tribunal. Manpaway balet so dalad eleng tan sangi ton may kobrador, agla inmolid liknaan, tan inatey kalabas na nigaran bekta. Nisesengeg ed saya akibiang so uley, impriso ray amá yo tan saraman natan so mamobusol ed sikaton maamot, pinmaway iran amin. Singa urán so inpapalsaran paklap iran nambabangil a dalem: indalem dan filibustero tan hereje; say man-hereje balbaleg lay kaatapan to anggan iner a pasen, lalo la nimet ed saman a panaon a say alcalde ya manouley ed luyag et masiadoy panangipanengneng toy inkamasantos to ya irosario toray ugugaw tod simbaan ed makmaksil a bosis ta pian narengel da lági arum a too et midasal irad sikato; et say filibustero lalon mauges ni lamet nen say hereje tan mas ambelat ni nen say anggano mamatey na talora nin kobrador a makabasa tan makasulat. Anggapoy sinmingger ed amá yo, pinaulian dan amin; saray papilis tan liblibro to inaala da ra. Inda-
(1) Say laki nen D. Rafael viscaino odino taga probinsia ran Vascongadas ya wala ya ed amianen na España ya saray taga sarayán pásen bálitádo ran maong a impanlaman tan mabiskeg.
