Tan si pari Damaso inyan toy akis a singa ugaw.
No tua tan, no inaro yoak, agyoak paneermenen ya anggadangga; natan ta inatey la, labay koy manmadre.”
Inampat nen masiken so muling to.
“Manmadre, manmadre!” kuanton inumanuman.
"Agmo amta, anako, so itsuray bilay, so maamot iran nagagawa ed dalem day atatagey a padir na ayaman day mamadre, agmo amta! Lablabayen konin aminlibo ya nanengneng takan masegsegang diad mundo nen say diman ed dalem . . . Dia, narengel iray eyey mo; no diman, padir labat so makangel ed sika . . . Malimgas ka. mapalaloy kalimgasan mo, tan agka inanak a para Sikato, agka inanak ya miasawa ed Kristo. Sisia moak. anako, anggapoy ag buraley panaon ya onlabas; no manbayag la, nalingoanan mo lan lamang, onsabi lamet ed sikay aro, tan naarom so asawam ... si Linares.”
“Say konbinto odino ... say patey!” kuanen Maria Clara ya inuman.
“Say konbinto, say konbinto odino say patey !” kuanen pari Damaso. “Maria, matatkenak la, magano lay pakaasikasok ed sika tan say kareenay panbilay mo ... Manpili kay sananey . . . mananap kay sananey ya aro, sananey a balolaki, anggan siopa, dapot no aleg lay konbinto!
Say konbinto odino say patey!”
“Dios ko, Dios ko!” kuanen pari ya iningal tan inakop toy uld to na sandua toran lima; “dudusaen moak, unorey linawam! balet ta agmo papauliay anako!...”
Tan inmarap ed Maria ya nankuan:
“Labay moy manmadre? Ditad gustom nasumpal, ta agtaka labay ya ompatey!”
Si Maria Clara binenbenan ton minesmes so sanduan lima nen pari Damaso, tan inangoban toran nanpinsiw a tinmalimokor.
“Padrinok! Padrinok!” kuanton inumanuman.
Nen onlalay pari Damaso, maerermen, tewek tan mangeswa.
“Katawan, Katawan, birbiren koy katuaan mo ta mangiiter kay dusa! Siak palay pangibalesan mo, agmo papasakitay andi kasalanan, ilaban moy anako!”
