“No anggapoy Linares et ibitay da met konoy Kapitan Tiago. Anto met ni arum a gawaen nen Maria Clara ey?” kuanen Victoria.
Linmabas a mankitlaey so sakey ya ugaw a laki, manbagtik a mamapaarap ed plasa, dimad pasen a panlalapoay bosis nen Sisa ya mangakanta. Diad liwawa met na bulan nabirbir a si Basilio. Samay impanlapo tod palandey, asabi toy abong da kalamor ya anggapoy too tan aderalderal. Sinoysuysoy ton tinetepet no inei so kawalaan nen Ina to, tan anganggad apapaway to so naambagel tan liberliber ed baley. Nipaakar ed kinen Crispin anggapoy akabatan ton balot.
Inakmon toy lua to kalamor, pinokpokan toy ermen to tan agla nanpainawa ya ginapoan to lan tampol ya inanap si ina to. Kasabi tod baley, akitepet no anengneng da, insan met la sinmabid layag toy pangankanta to. Pinokpokan toy anggaay nayarian to so panggiwgiw day sail to, tan labay to komoy ombatibatik a lakalakapen toy ina to.
Si ambagel balet ed saya tinmaynan lad man ed plasa tan akasabin anggad arap na abong nen balon alferez. Singa nen saman, wala met natay manbabantay a sondalo ed pinto, tan ontan met a walay uloy bii ya akalondaw a manantandang ed dorongawan, balet ta aliwan si Medusa, no ag sakey a biin wala nid kalangueran, kanian aliwa met sirin ya amin ya alferez et masegsegang.
Ginapoan nen Sisa so anganta ed petek ton may abong a tangtangayen to may bulan ya onkokurang a napnoy kabintaan ed katawenan ed utel day amusiak a lurem. Sankanengneng nen Basilio, balet ta ag ontalek ya onasingger, ta aalagden to lagin makaarawid man insan to dagoen; basilbasil ed biek tan biek, balet ta papaliisan toy kuartel.
Samay biin walad dorongawan tatalinengen ton maong so kanta ton may ambagel, tan ingganggan tod samay bantay a pasegepen to. Kanengneng nen Sisa balet ya onaasingger imay sondalo tan kangel tod bosis to, ataktakot a pinasia tan inyan toy kuyat ya amta lay peles na kababatik na ambagel. Si Basilio ta mapagan nabalangan to, inyan to met so batik ya onaabot, ya alingoanan to la kalamor so salat daray sail to.
