Ontubong met komoy Basilio et kaput imay pinto ta insara ton may ambagel ya itutulak ton pinaspasia na taklay to ran nabengan tan ulo ton manyanggoy buek ton agolgol.
“Ina, siak, siak, siak si Basilio ya anak yo!” kuanton maningal, ya inlespak to la ed gaway kesaw to.
Ag mangonpang balet si ambagel; intakal to ray duaran sail tod dalin a dimay panpupuirsaan ton maong ed pangitutulak ton may kaput.
Pinapalpal nen Basilio y poniti to may kaput, inbabangga toy ulo to ya naames lay dala, manakis . . . et anggapoy agawaan to. Nankalkalnan inmalagey a mairirap, ninenengneng to may padir a manaanap na nakalaban to et anggapoy nanengneng ton napangipasngatan toy sali to. Niliber to, insan to anengneng so sakey a sanga ton may makapataktakut a baliti ya akisangalan ed sangay sananey a kiew. Kinmalab a tampol a say panangaro tod ina toy mangiiter ed sikatoy sungdo ed onman lan kapoy tan kesaw to; nanbasilbasil ed pigapigan sanga anggad impakarapat tod samay baliti, insan to anengneng si ina to ya itatakal to ni ulo to ed saramay kaput na pinto.
Atawag so imano nen Sisa ed kakakalasikis da ran may sanga; pinmigar tan iyan to lamet wari batik, si anak to balet tinmaboy a biglad mad petek to, nilakap ton pinaspasia ya inaangoban, insan nakalay liknaan.
Anengneng nen Sisa so muling a naames na dala; inosdongan ton kinonineng a ngalngali onpultak iray mata to ed onman lan panmoldag da, tineregan to, tan saman a lupan amespesiaw tan nabnabengan singa to atenyeg so naugip ya utek to; singa sakey a biglan layap na kirmat so sinmibual ed kanunotan to . . . abirbir toy anak to, biglan inmeyag tan tinakbaan ton nilakap ya inaangoban si nakalay liknaan ya ugaw.
Wadman iran sanina ya ag onggalagalaw . . .
Nen naimasmasiin si Basilio, anengneng toy ina ton anggapoy liknaan. Liliingen ton tinawag na masamsamit iran ngaran, et nen agto nabangon tan agmet onlilinawa, inmalaguey, linmad man ed kulds, angalay danum ed kinalinsurum ton bulong na ponti tan dinidilamosan toy amespesiaw a lupa nen ina to. Saya balet siansian ag ginmalaw tan agmet linmimata.
Inimano nen Basilio ya napnoy takot; impapeg toy
layag to ed petek na puso to, et samay kinmebet ya ka-
