lem dad panaawat toy palapágan a Correo de Ultramar(1) tan arum niran palapágan a manlalapod Madrid, indalem dad impangibaki tod sikayo ed Suiza Alemaña, indalem da met ta akalmo rad papipapil to na sulat tan ritratoy sakey a pári ya atutolan a pinatey, (2) tan agko la amta no antoni ramay arum. Anggan anto pangikukuan day pangidaleman dad sikato, pati pansosulong toy barong tagalog ya anta walay dala ton kastila. No sananey a too labat angankoy amá yo akapaway la komon a tampol ed pangawan, ta walay sakey a doktor a say kuanton inateyan ton may kobrador et ataki, balet ta say kayamanan to, say malet a pananisia tod kaptekan, tan say impangula to ed antokaman ya andid maptek tan ag inpadalan ed katunongan, sikarayay akadetdet ed sikato. Siak a díli, anta ontan lay
impankabusol kon onsingger ya onkerew na panangasid anggan siopa, linma ak ed Kapitan General, say sinoblayan toniay wadia natan, ya inpaliwawak ed sikato ya ag nayarin Filibustero so sakey a toon ontan lay panangasikaso tan pananulong tod saray kakastilan anggapoy nayarian da, onó saray kasabisabí ra dia ya parawesen toran panayamen ed abong to tan bilayen to ra, tan sakey ni wala nin onkukorang ed laman to so dalay kastila. Anggapoy kabaliksay impansambak ya ebatan koy ulok so katuaay ibabagak, alenleneg ya agamoran ko so aliwaliwan impantrato rad siak tan impanawag dad siak na chiflado ya pananawag dad saray kakastilan nanaaliway uló ra ed gaway bayag dala diad Pilipinas."
Tinmondá lamet si teniente ya nanpainawa tan nen anengneng ton andi esel tan akaosdong imay iba to, intuloy toy oniá:
"Ginawak so anggaay nayarian ko, ya unong ed bilin nen amá yo, ta pian naganoan tan maong so kasumpalay asunto to. Nilak si A..... ya bantog ya abogadon pilipino et agto inakoy asunto --'Natalo labat no siak so manbenben,' kuanto. 'Say pangikurang ko makasengeg lamet na pangidaleman dad sikara, no ag pati siak ni ingen so nidálem. Lákila ed kinen si Sr. M.... ta maong
(1) Palapógan a gagawaen ed Madrid, kapital na España.
(2) Ritrato anganko nen pári Burgos, onó pári Zamora, odinó pári Gomez.
