tagtaglang a pagew to ambetebetel tan anggapoy nalikas ton parok; intotob to ray bibil to ed bibil ira nen
ina to tan anggapoy alikas ton linawa. Si pangaskasiyan a ugaw inlakalakap tod bangkay a mannangis a maninatey.
Managaag so bulan ed katawenan tan mapalpalayupoy so dagem a sankarengel so uni ray bigibigis ya akaamot ed kadikaan. Saman a labi, ya angiter na liwawa tan liket ed ag nabilang iran ugugaw, a mamapalabas ira ed simpok day atateng tan kakanayon da na sakey ed saray pistan manangiter na sankasamitan iran pakanunotan, pista lantin mangipapanunot na inmonaonan limgis na aro ya impaakseb na tawen ed kadalinan; saman a labi ya panliliketan day amin a makristianon boleg, a mantadia ra, mandorongo ran mangan, maniinom, mankakanta, mansasayaw, maneelek, manggagalaw, manaaroan, manaangoban ... saman a labi ya diad bansa ran ambetel a pepelagay hielo et sakey met a la bin singa inkantado ed saray ugugaw a manimimis iray mata ran malilimpek ya aaninagay malinlinew daran kanunotan, tan nanaayapan iran mannengnengneng ed naugaliyan a sangay kiew a saleng a pinaparakep na silew iran nambabangil a kolor tan sinasabitay akamayamay a kakanen tan nanduruman galawgalaw, saman a labi anganggad niiter to kalamor ed Basilio so inkaulila to . . . Siopay makapangibaga? Nayari met a diad panaayaman nen agmasmasel a pari Salvi et wala ra met so ugugaw a manggagalaw tan mangankanta lagi na:
- Say Labi Inkianak so onsasabi,
- Say Labi Inkianak met so onsisipot . . .
Si Basilio abayag a mannangis tan mansibek, tan nen intangwa toy ulo to anengneng toy sakey a laki ya manalalagey ed arap to ya sankanengneng ton andi esel.
“Anak to ka?” kuanton man ya agto kabkabat a laki ya tinepet ed bosis a makalna.
Intanger nen ugaw so ulo to.
“Antoy kanunotan mon gaween ey?”
"Ipunpon ko ra!”
"Diad kamposanto?”
“Anggapoy kuartak, tan sakey ni agto yabuloy nen kura."
“Anto sirin ey ... ?”
“No labay yoak ya ibaan..."
