"Makapkapoy ak,” kuanton may toon inmebat a
nankalkalnan inyurong tod dalin ya intakal toy duan
lima to, "sugatan ak . . . insan duay agew lan agak ni
angan tan inmogip . . . Anggapoy arum a toon linma dia
natan?”
Samay laki singa mannonunot ya iimanoen toy lupa ton may ugaw.
“Imatlek mon maong so ibagak ed sika,” kuanto ed bosis ton mankalna; "inatey ak met la anganko kasakbayay manliwawa ... mamilang kay sakey a duamplon kondang a manlapo dia ya mamaarap kad mad biek a gilig na kulos, wadmay sankabonton a kiew ya amagaan; olor mo dia, manggawa kay talaksan, itapew mo ray bangkay mi, itabon moy keran kiew, insan sinitan mo tan parlang mon maong anggad agkami manmaliw a dapol . .
Tatalinengen nen Basilio.
“Kayarim, no anggapo ladiay onsabi ... mankotkot ka dia, naalmon so akamayamay a balitok ... alam ya amin . . . kien mola. Manaral ka!”
Mankapoy so bosis ton may laki ya ngalngalin agla natalusan.
“Laka ta alam lamay kiew pian naibaan taka ni.”
Imanlay Basilio. Samay too, inlingay toy lupa to ed Letakan tan inesaes toy onia ya singa mandarasal:
"Ompatey ak ya agko nanengneng so liwawan ompelnak ed dalin kon nianakan ! sikayon makanengneng, ilugay yo..... agyo lilingoanan iray inatey ed kabilungetan!”
Intangay toray mata to ed tawen, manggalaw iray bibil to ya singa mandarasal, insan intewek toy ulo to, tan nankalkalnan atumba.....
Kalabas na duay oras, si Hermana Rufa wadmad batalay abong to ya mandidilamos ta mimisa. Nibanan akaarap dimad takel tan anengneng toy makapakapal ya asewek ya ontatagey; sinilot toy kirep to tan ampetang so ulo ton nankuan:
“Siopa lamet kasi hereje ya mankakaingin na agew na pista? Sikato layay ag isasabi mantatabon a segsegang! Ompatey kan siansia ta napaktak kad Purgatorio, agtaka aonen diman, salbaje!”
