"On, dimad toktok na atep na konbinto..... satan
iman angankoy ibabaga ran madre ya mandudukdok
na ngalab no lábi!"
Samay distinguido imbutay toy uló to ta labay to met a nengnengen.
Kinmirmat lamet ya andukedukey ya apuy so binmatak a nanlikewlikew ed tawen, tan tinmonbok so makmaksil a karol.
"Jesús !" kuanto ya angorus met.
Ta diad kidiam ton may kirmat anengneng ton tuay sakey a biin nankawes na ampotí, ya wadman lawari ed bubungan ya akaarap ed tawen iray lupa tan sandua ton lima ya singa mikakasi. Say tawen balet eebatan toy kirmat tan karol!
Kalabas na anieweng ton may kaunoran a karol nangel so marmaermen a tagleey!
"Aliwan dagem, samay aniani!" kuanton inmeremere may sondalo ya pinagkaebat to ed impamirit ton may sakey na lima to.
"!Ay! lay!" kuay dengdenglen dan dageyem a natatapewan toy kasil na uran; say panngisiw na dagem agto natabonan iman a masamsamit tan makapasíbeg a bosis a sankaermenan.
Kinmidiam lamet so kirmat a pinaspasiay liwawa.
"!Andi, aliwan aniani!" kuanton may distinguido; "anengneng ko lamet; maong a bii ya singa Virgen .....
Italá ta ipakabat tad saray Makauley."
Singa ag akankangel imay sondalo tan iman la ran duan masigsiglat.
Siopa kasi maningel ed kaitlekay lábi ed onman lan pelés na dagem tan kasil na urán? Siopa kasin maadia tan andi tilol a Virgen ya asawa nen Jesucristo so sinugbá toy makapataktakut ya interak na bagyó, karol tan kirmat, tan pinilí to man a makakebiew a lábi tan maawang a katawenan, ya asabí to man va atagey tan maatap a pasen a diman to ipapaarap iray tagleey to ed Dios? Inkaindan pa la lági Katawan so aya- man to ed konbinto ya agto la ra dedengelen so pikakási? Ag pa la lági ontalus ed atep ton man ya ayaman so pirawat na kamarerua ya onsegep ed tronoy Mapangasin Sankatageyan?
Sanlabin ag angonpang so kasil na dagem tan urán,
tan anggapoy hinmutay ya anggan saksakey a bitewen: ontan met ya ag tinmonda may masegsegang a tagleey
